މަޝްހޫރު އޭއައި ކުންފުނި އޯޕަން އޭއައިއިން ސޯޝަލް މީޑިއާ ޕްލެޓްފޯމެއް ތައްޔާރުކުރަމުންދާ ކަމަށް ޓެކް ރިޕޯޓެއްގައި ބުނެފިއެވެ.
އަންގާރަ ދުވަހު ނެރުނު ރިޕޯޓުގައި ބުނެފައިވާ ގޮތުން، މި މަޝްރޫޢު މިހާރު ވަނީ ފެށުމުގެ މަރުހަލާގައެވެ. އެގޮތުން މިހާރު ވަނީ ޗެޓްޖީޕީޓީގެ އިމޭޖް ޖެނެރޭޝަން ފީޗާއަށް އަމާޒުކޮށްގެން އެތެރޭގެ ޕްރޮޓޯޓައިޕެއް ތައްޔާރުކޮށްފައެވެ. މި ޕްރޮޓޯޓައިޕްގައި ސޯޝަލް ފީޑެއް ހިމެނެއެވެ.
މިކަމާ ގުޅޭ ގޮތުން ރޮއިޓާޒްއިން އޯޕަން އޭއައިއަށް ކޮމެންޓަކަށް އެދުމުން، އެ ކުންފުނިން ޖަވާބެއް ދީފައެއް ނުވެއެވެ.
ވާޖްގެ ރިޕޯޓުގައި ބުނެފައިވާ ގޮތުން، އޯޕަން އޭއައިގެ ސީއީއޯ ސެމް އޯލްޓްމަން ދަނީ މި މަޝްރޫޢާ ގުޅިގެން އަމިއްލަ ގޮތުން ބޭރުގެ ފަރާތްތަކުގެ ޚިޔާލު ހޯދަމުންނެވެ. ނަމަވެސް މި ސޯޝަލް ނެޓްވޯކް ވަކި އެޕްލިކޭޝަނެއްގެ ގޮތުގައި ނެރުމަށް ނުވަތަ ޗެޓްޖީޕީޓީއާ އެއްކުރުމަށް ކުންފުނިން ގަސްދުކުރަނީ ކަމެއް އަދި ސާފެއް ނޫނެވެ.
މި ސޯޝަލް ނެޓްވޯކް ޗެޓްޖީޕީޓީ މެދުވެރިކޮށް ތަޢާރަފުކުރުމުން، އީލޮން މަސްކް އަދި މާކް ޒަކަބާގްގެ މެޓާއާ އެކު އޯލްޓްމަންގެ ވާދަވެރިކަން އިތުރުވެދާނެ ކަމަށް ބެލެވެއެވެ.
މަސްކް އާއި އޯލްޓްމަން އަކީ 2015ވަނަ އަހަރު އޯޕަން އޭއައި ފެށުމުގައި އެކުގައި މަސައްކަތްކުރި ދެ ފަރާތެވެ. ނަމަވެސް ފަހުން އެ ކުންފުނި ހިންގާނެ ފަރާތަކާ މެދު ދެ ފަރާތުގެ މެދުގައި ވާދަވެރިކަން އުފެދުނެވެ. އަދި 2018ވަނަ އަހަރު މަސްކް އޯޕަން އޭއައިގެ ބޯޑުން އިސްތިއުފާ ދިނުމަށްފަހު، ދެ ފަރާތުގެ މެދުގައި ދިގު މުއްދަތެއްގެ ޚިލާފު އުފެދިފައިވެއެވެ.
މަސްކް އަކީ އޯޕަން އޭއައިގެ ކުރީގެ އިންވެސްޓަރެއް އަދި ބޯޑު މެންބަރެކެވެ. އޭނާ ވަނީ ފާއިތުވި އަހަރު އޯޕަން އޭއައިގެ މައްޗަށް ދަޢުވާ އުފުލާފައެވެ. މި ދަޢުވާގައި ބުނެފައިވަނީ، އޯޕަން އޭއައި އިން އާންމުންނަށް ފައިދާ ކުރުވުރުވަނިވި ނޮން-ޕްރޮފިޓް ރިސާޗް ލެބެއްގެ ގޮތުގައި އުފެއްދި އެ ކުންފުނީގެ އަސްލު މަޤްޞަދުތަކާ ޚިލާފުވެފައިވާ ކަމަށެވެ.
މަސްކް ވަނީ 2015އިން 2018އަށް އޯޕަން އޭއައިއަށް ގާތްގަނޑަކަށް 45 މިލިއަން ޑޮލަރު އިންވެސްޓްކޮށްފައެވެ.
މީގެ އިތުރުން، މި އަހަރުގެ ކުރީކޮޅު މަސްކްގެ އިސްނެގުމުގެ ދަށުން އިންވެސްޓަރުންގެ ގްރޫޕަކުން ވަނީ އޯޕަން އޭއައި ގަތުމަށް ގާތްގަނޑަކަށް 97.4 ބިލިއަން ޑޮލަރުގެ އޮފާއެއް ހުށަހަޅާފައެވެ.
މި ހުރިހާ ކަމަކާއެކު، އޯޕަން އޭއައި އިން އަމިއްލަ ސޯޝަލް މީޑިއާ ޕްލެޓްފޯމެއް ތަޢާރަފުކުރުމަކީ އާޓިފިޝަލް އިންޓެލިޖެންސްގެ ދާއިރާގައި އިތުރު ވާދަވެރިކަމެއް އުފެދިގެންދާނެ ކަމެކެވެ. އަދި މިކަމުގެ ސަބަބުން އޯޕަން އޭއައި އާއި އެކްސް އަދި މެޓާ ފަދަ ބޮޑެތި ޓެކްނޮލޮޖީ ކުންފުނިތަކާ ދެމެދު އޮންނަ ގުޅުމަށް ބަދަލުތަކެއް އަތުވެދާނެ ކަމަށް ބެލެވެއެވެ.
މި މަޝްރޫޢު ވަނީ އަދި ފެށުމުގެ މަރުހަލާގައި ކަމަށް ވުމާއެކު، އިތުރު ތަފުސީލުތައް ލިބެމުންދާނެ ކަމަށް ބެލެވެއެވެ. އޯޕަން އޭއައިއިން މި މައްސަލައާ ގުޅޭ ގޮތުން ރަސްމީ ބަޔާނެއް ނެރުމަކީ ވެސް އެކަށީގެންވާ ކަމެކެވެ.