މެދުއިރުމަތީގައި މިހާރު ހިނގަމުން އަންނަ ބޮޑު ހަނގުރާމައިގެ ސަބަބުން ރާއްޖެ އަންނަން ކުރިން ބުކިން ހަދާފައިވާ އެތައް ހާސް ބަޔަކަށް ނާދެވި, ބުކިންތައް ކެންސަލް ކުރަމުން އަންނަ ކަމަށާއި މީގެ ސަބަބުން ވިޔަފާރިތަކަށް ބޮޑު އަސަރެއް ކުރާނެ ކަމަށް, އޭވިއޭޝަން ދާއިރާގެ ތަޖުރިބާކާރު މުޙައްމަދު ފިރާޤު މިއަދު ވިދާޅުވެއްޖެއެވެ.
މެދުއިރުމަތީގައި ހިނގަމުންދާ ހަނގުރާމައާއި ނުތަނަވަސްކަމުގެ ސަބަބުން ރާއްޖޭގެ ފަތުރުވެރިކަމަށް ބޮޑެތި ގޮންޖެހުންތަކަކާ ކުރިމަތިލާން ވަނީ ޖެހިފައެވެ.
"އިނަ މޯލްޑިވްސް"ގެ ވެރިޔާ އަދި އޭވިއޭޝަން ދާއިރާގެ ތަޖުރިބާކާރު މުޙައްމަދު ފިރާޤު ވިދާޅުވި ގޮތުގައި، މިހާރު ދުވާލެއްގެ މައްޗަށް ގާތްގަނޑަކަށް 2،500 އާއި 3،000 އާ ދެމެދުގެ އަދަދަކަށް ފަތުރުވެރިންގެ ބުކިންތައް ދަނީ ކެންސަލްވަމުންނެވެ. މިއީ ރާއްޖެއަށް އާމްދަނީގެ ގޮތުން ލިބޭނެ ވަރަށް ބޮޑު ގެއްލުމެއްކަމަށް އޭނާ ފާހަގަކުރެއްވިއެވެ.
ދުނިޔޭގެ ވައިގެ ދަތުރުފަތުރުގެ ނިޒާމަށް އައިސްފައިވާ މި ކުއްލި ބަދަލާއެކު، ރާއްޖެއަށް އަންނަން ތާވަލުކޮށްފައިވާ އެތައް ހާސް ފަތުރުވެރިންނެއްގެ ދަތުރުތައް ވަނީ ހުއްޓުމަކަށް އައިސްފައެވެ.
ފަތުރުވެރިކަމަށް ބަރޯސާވެފައިވާ ރާއްޖޭގެ އިޤްތިޞާދަށް މިކަމުގެ ސަބަބުން ކުރާނެ ނޭދެވޭ އަސަރުތައް ވަރަށް ބޮޑެވެ. ފިރާޤު ފާހަގަކުރެއްވި ގޮތުގައި، ބުކިންތައް ކެންސަލްވުމުގެ މާނައަކީ ހަމައެކަނި ރިސޯޓުތަކަށް ލިބޭ އާމްދަނީ ދަށްވުމެއް ނޫނެވެ. އޭގެ ބަދަލުގައި، ފަތުރުވެރިކަމާ ގުޅިފައިވާ އެހެނިހެން ކުދި އަދި މެދު ފަންތީގެ ވިޔަފާރިތަކަށްވެސް މީގެ ނޭދެވޭ އަސަރު ވަރަށް އަވަހަށް ފޯރާނެއެވެ.
އޭގެ ތެރޭގައި ޓްރާންސްޕޯޓް ނިޒާމުތަކާއި، ކާބޯތަކެތި ސަޕްލައިކުރާ ފަރާތްތަކާއި، އަދި ލޯކަލް ޓޫރިޒަމްގައި ހަރަކާތްތެރިވާ ގެސްޓްހައުސްތަކަށްވެސް މިކަމުގެ ސަބަބުން މާލީ ދަތިތަކާ ކުރިމަތިލާން ޖެހޭނެކަމަށް ބެލެވެއެވެ.
ރާއްޖެއަށް ޒިޔާރަތްކުރާ ފަތުރުވެރިންގެ އަދަދު ކުއްލިއަކަށް ދަށްވުމަކީ ދައުލަތަށް ލިބޭ ޓެކްސް އާމްދަނީ މަދުވެ، ޤައުމީ އިޤްތިޞާދަށް އޭގެ ލޮޅުން އަރާނެ ކަމެކެވެ.
މިހާރު މެދުއިރުމަތީގައި ހިނގަމުންދާ ހަނގުރާމައިގެ ސަބަބުން އެ ސަރަޙައްދުގެ ވައިގެ ސަރަޙައްދުތައް ބަންދުކުރުމާ ގުޅިގެން، ދުނިޔޭގެ ދަތުރުފަތުރުގެ ނިޒާމަށް ވަނީ ބޮޑެތި ބަދަލުތަކެއް އައިސްފައެވެ. ތަފާސްހިސާބުތައް ދައްކާގޮތުން، ރާއްޖެއަށް ޒިޔާރަތްކުރާ ފަތުރުވެރިންގެ ތެރެއިން 30 އިންސައްތައާއި 35 އިންސައްތައާ ދެމެދުގެ އަދަދެއްގެ މީހުންނަކީ މެދުއިރުމަތީގެ އެއާލައިންތައް މެދުވެރިކޮށް ނުވަތަ އެ ސަރަޙައްދުގައި ޓްރާންސިޓްކޮށްފައި އަންނަ މީހުންނެވެ. ޚާއްޞަކޮށް ޔޫރަޕުން އަންނަ ގިނަ ފަތުރުވެރިން ބޭނުންކުރަނީ ދުބާއީ، ދޯހާ އަދި އަބޫދާބީ ފަދަ ޓްރާންސިޓް ހަބްތަކެވެ.
ޖެނުއަރީ މަހު ރާއްޖެއަށް ޒިޔާރަތްކުރި 225،000 ފަތުރުވެރިންގެ ތެރެއިން 127،000 އަށްވުރެ ގިނަ މީހުންނަކީ ޔޫރަޕުން އައި މީހުންނެވެ. މީގެ ތެރެއިން ގިނަ މީހުންނަކީ މެދުއިރުމަތީގެ ހަބްތައް މެދުވެރިކޮށް ދަތުރުކުރި މީހުންނަށް ވުމާއެކު، މި ހަނގުރާމައިގެ ސަބަބުން އެންމެ ބޮޑު ހީނަރުކަމެއް އައިސްފައިވަނީ ޔޫރަޕުގެ މާކެޓަށެވެ.
ފަތުރުވެރިކަމާ ބެހޭ ވަޒީރު އިބްރާހީމް ޠާރިޤު ދާދިފަހުން ވިދާޅުވެފައިވަނީ، މެދުއިރުމަތީގެ މައްސަލަތަކާ ގުޅިގެން ރާއްޖެއަށް ފަތުރުވެރިން އުފުލާ އެއާލައިންތަކުގެ ކެޕޭސިޓީ 31 އިންސައްތަ ދަށްވެފައިވާ ކަމަށެވެ. އަދި ބުކިން ހަދާފައިވާ ފަތުރުވެރިންގެ ތެރެއިން 35 އިންސައްތަ މީހުންނަށް ރާއްޖެއަށް ނާދެވިދާނެކަމުގެ ބިރު އެބައޮތްކަމަށްވެސް ވަޒީރު ވިދާޅުވިއެވެ.
އެމިރޭޓްސް، އިއްތިހާދު، ޤަތަރު އެއާވޭސް އަދި ގަލްފް އެއާ ފަދަ ބޮޑެތި އެއާލައިންތަކުގެ ދަތުރުތަކަށް ބުރޫއަރާފައިވާއިރު، ފްލައިޓްތައް ކެންސަލްވުމުގެ ސަބަބުން 4،900 އަށްވުރެ ގިނަ ފަތުރުވެރިންނަށް ދަތުރުނުކުރެވި، ތާށިވެފައިވާކަންވެސް ސަރުކާރުން ވަނީ ހަނގުރާމައިގެ ކުރީކޮޅު ހާމަކޮށްފައެވެ.
މި މައްސަލައަށް ޙައްލެއް ހޯދުމަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ޚާއްޞަ ކެބިނެޓް ކޮމިޓީއެއް އެކުލަވާލައްވައި، އަވަސް ފިޔަވަޅުތަކެއް އަޅުއްވަން ފައްޓަވާފައެވެ. ފަތުރުވެރިކަމާ ބެހޭ ވުޒާރާއިން މިހާރު އެންމެ ބޮޑު އިސްކަމެއް ދެމުންދަނީ މެދުއިރުމައްޗަށް ބަރޯސާނުވާ މާކެޓުތަކުން ފަތުރުވެރިން ގެނައުން އިތުރުކުރުމަށެވެ. އެގޮތުން، ޗައިނާ، އިންޑިއާ އަދި ރަޝިއާއިން އަންނަ ފްލައިޓުތައް އިތުރުކުރުމުގެ މަސައްކަތް ދަނީ ކުރަމުންނެވެ. މިކަމުގެ އަސަރު ކުޑަކުރުމަށްޓަކައި، ރާއްޖޭގެ އެމްބަސީތަކާ ގުޅިގެން އިންޑިއާ، ޗައިނާ އަދި ރަޝިއާގައި ޚާއްޞަ މާކެޓިން ކެމްޕޭންތަކެއް ފެށުމަށް ސަރުކާރުން ވަނީ ތައްޔާރުވެފައެވެ.
ޓްރާންސްޕޯޓް މިނިސްޓްރީން މަޢުލޫމާތު ދެއްވާގޮތުގައި، އޭރޯފްލޮޓް އަދި އެއާ އިންޑިއާއިން ފްލައިޓްތައް އިތުރުކުރުމަށް ވަނީ ނިންމާފައެވެ. އަދި އެއާއޭޝިއާއިން ރާއްޖެއަށް ވައިޑް-ބޮޑީ ބޯޓުތައް ބޭނުންކޮށްގެން ދަތުރުތައް ފެށުމަށްވެސް ދަނީ ތައްޔާރުވަމުންނެވެ. މީގެ އިތުރުން، ޓާކިޝް އެއާލައިންސްގެ ދަތުރުތައް ފުޅާކުރުމާ ގުޅޭގޮތުންވެސް ދަނީ މަޝްވަރާކުރެވެމުންނެވެ. ފްލައިޓް ކެންސަލްވުމުގެ ސަބަބުން ރާއްޖޭގައި ތާށިވި 1،680 އަށްވުރެ ގިނަ ފަތުރުވެރިންނަށް ސަރުކާރުން ވަނީ އެހީތެރިކަން ފޯރުކޮށްދީފައެވެ.
މި ދަނޑިވަޅަކީ މުޅި ޤައުމު ގުޅިގެން މަސައްކަތްކުރަންޖެހޭ ވަގުތެއްކަން ފާހަގަކުރައްވަމުން، ފިރާޤު ވަނީ މިއީ ކޮންޓްރޯލުން ބޭރުގައިވާ ކަންތައްތަކެއް ނަމަވެސް، އެއްވެސް ކަމެއް ނުހިނގާފަދައިން ޤަބޫލުކޮށްގެން ތިބުމުގެ ބަދަލުގައި، ޙާލަތު އިތުރަށް ގޯސްވުމުގެ ކުރިން ޒިންމާދާރުކަމާއެކު ހަގީގަތާ ކުރިމަތިލުމަށް ގޮވާލައްވާފައެވެ.
ފަތުރުވެރިކަމުގެ ސިނާޢަތުގެ ތަޖުރިބާކާރުން ލަފާކުރާ ގޮތުގައި، މި ދަތިތަކުން އަރައިގަތުމަށް މަދުވެގެން ދެތިން މަސްދުވަސް ނަގާނެއެވެ. އެހެންކަމުން، މި ވަގުތު އެންމެ މުހިންމީ ސަރުކާރާއި އަމިއްލަ ވިޔަފާރިތައް ގުޅިގެން، ރާއްޖެއަކީ ފަތުރުވެރިންނަށް ރައްކާތެރި އަދި ދަތުރުކުރަން ފަސޭހަ މަންޒިލެއްކަން ބޭރު ދުނިޔެއަށް ސާބިތުކޮށްދިނުމަށް މަސައްކަތްކުރުމެވެ.