ރާއްޖޭގައި މިހާރު ކުރިއަށްދާ ސާފް 20 އަހަރުން ދަށުގެ ފުޓްބޯޅަ މުބާރާތުގައި ބަންގްލަދޭޝްގެ ޒުވާން ޓީމުން ދައްކަމުންދާ މޮޅު ކުޅުމުގެ އަސްލަކީ ގަލޮޅު ދަނޑަށް ވަންނަ ގިނަ އަދަދެއްގެ ބަންގްލަދޭޝް ސަޕޯޓަރުންގެ ހޫނު ތަރުހީބު ކަމަށް އެ ޓީމުން ބުނެފިއެވެ.
ސެމީ ފައިނަލްގައި ނޭޕާލް 1-0 އިން ބަލިކޮށް، ޖެހިޖެހިގެން ތިންވަނަ ފަހަރަށް މުބާރާތުގެ ފައިނަލުން ޖާގަ ހޯދުމަށްފަހު، ބަންގްލަދޭޝްގެ އެސިސްޓަންޓް ކޯޗު އަތީގުއްރަހްމާން މީޝޫ ބުނީ، ދަނޑުމަތިން ފެންނަނީ އަމިއްލަ ގައުމުގައި ކުޅޭ ފަދަ "ހޯމް" މެޗުތަކެއްގެ އިހުސާސް ކަމަށެވެ.
ދަނޑުގެ ރެކޯޑް އަދަދުތައް ބަންގްލަދޭޝް އަތުގައި
މިފަހަރުގެ މުބާރާތުގައި އެންމެ ގިނަ ސަޕޯޓަރުން ދަނޑަށް ވަދެފައިވަނީ ބަންގްލަދޭޝްގެ މެޗުތަކަށެވެ. ތަފާސްހިސާބުތަކަށް ބަލާއިރު:
ބަންގްލަދޭޝް - އިންޑިއާ: 3,932 ސަޕޯޓަރުން
ބަންގްލަދޭޝް - ނޭޕާލް (ސެމީ): 3,910 ސަޕޯޓަރުން
ބަންގްލަދޭޝް - ޕާކިސްތާން: 2,550 ސަޕޯޓަރުން
މިއީ މުބާރާތް ބާއްވާ ގައުމު، ދިވެހިރާއްޖެ ކުޅުނު މެޗުތަކަށްވުރެ ވެސް މަތީ އަދަދުތަކެކެވެ. ރާއްޖެ ކުޅުނު އެންމެ ފޯރިގަދަ މެޗަށް ވަދެފައިވަނީ 3,863 ސަޕޯޓަރުންނެވެ.
ގަލޮޅު ރަސްމީ ފުޓުބޯޅަ ދަނޑުގައި ބަންގްލަދޭޝް ސަޕޯޓަރުން-- ފޮޓޯ: ސިޑިބަރި
"ސަޕޯޓަރުންނަކީ އަހަރެމެންގެ ބާރު"
ހެޑް ކޯޗު މާކް ކޮކްސް ސަސްޕެންޝަނުގައި ހުރުމުން، ޓީމަށް އިރުޝާދު ދިން އެސިސްޓަންޓް ކޯޗު މީޝޫ ބުނީ، ސަޕޯޓަރުންގެ ފަރާތުން ލިބޭ ހިތްވަރަކީ ކުޅުންތެރިން ދަނޑުމަތީގައި ދައްކާ ހިތްވަރުގެ ސިއްރު ކަމަށެވެ.
"ވަރަށް އުފާވޭ އަދި ފަހުރުވެރިވޭ އެ މީހުން އައިސް އެގޮތަށް ސަޕޯޓްދޭތީ. އެއީ އަހަރެމެންނަށް ލިބޭ ވަރަށް ބޮޑު ހިތްވަރެއް،" އޭނާ ބުންޏެވެ.
2024 ވަނަ އަހަރުގެ ޗެމްޕިއަން ބަންގްލަދޭޝްގެ އަމާޒަކީ މާދަމާރޭ އޮންނަ ފައިނަލްގައި އިންޑިއާ ބަލިކޮށް، ތަށި ދިފާއުކުރުމެވެ. މިދިޔަ އަހަރުގެ 19 އަހަރުން ދަށުގެ މުބާރާތުގެ ފައިނަލްގައި އިންޑިއާ އަތުން ޕެނަލްޓީ ޖަހައިގެން ވީ ބަލިން އަރައިގަނެ، މިފަހަރު ތަށި އުފުލާލުމުގެ އަޒުމް ބަންގްލަދޭޝް އޮތީ ވަރުގަދަކޮށްފައެވެ.
ފޯރިގަދަ ފައިނަލް މެޗު އޮންނާނީ މާދަމާރޭ 20:30 ގައި ގަލޮޅު ރަސްމީ ދަނޑުގައެވެ. ބެލެވޭ ގޮތުގައި މި މެޗަށް ވެސް ރެކޯޑް އަދަދަކަށް ބަންގްލަދޭޝް ސަޕޯޓަރުން ޖަމާވާނެއެވެ.