އެއް ފޯނުން ކުރަން ފަށާ ކަންކަން އަނެއް ފޯނުން ކުރިއަށްގެންދެވޭ 'ކޮންޓިނިއު އޮން' ފީޗާ އެންޑްރޮއިޑް 17 އަށް އިތުރުކޮށްފިއެވެ.
ކެލިފޯނިއާގައި ދާދި ފަހުން ބޭއްވި ގޫގުލްގެ އައިއޯ 2026 އިވެންޓުގައި، އެންޑްރޮއިޑް 17 އާއެކު ތައާރަފުކުރާނެ ވަރަށް ބޭނުންތެރި އައު ފީޗާއެއް ކަމަށްވާ 'ކޮންޓިނިއު އޮން' ފީޗާ ގޫގުލްއިން ދައްކާލައިފައިވާއިރު، މިއީ އެޕަލްގެ 'ހޭންޑްއޮފް' ފީޗާއާ ދާދި އެއްގޮތަށް އެންޑްރޮއިޑް ޑިވައިސުން ކުރަން ފަށާ މަސައްކަތް އެހެން ޑިވައިސަކަށް ބަދަލުވެގެން އޮމާންކަމާ އެކު ކުރިއަށް ގެންދިއުމަށް އެހީތެރިވެދޭނެ ފީޗާއެކެވެ.
މީގެ ސަބަބުން އެއް އެޕްލިކޭޝަނެއްގައި މަސައްކަތް ކުރަމުންދަނިކޮށް، ހުއްޓާލި ހިސާބުން އަނެއް ޑިވައިސްއަށް އެ މަސައްކަތް ބަދަލުކޮށްލެވޭނެއެވެ.
ގޫގުލްއިން ކަށަވަރުކޮށްދީފައިވާ ގޮތުގައި، މި ފީޗާ އެންމެ ފުރަތަމަ ބޭނުންކުރެވޭނީ މޮބައިލް ފޯނާއި ޓެބްލެޓްތަކާ ދެމެދުގައެވެ. މިގޮތުން އެންޑްރޮއިޑް 17 (އޭޕީއައި ލެވެލް 37) އާއެކު އަންނަ މި ކްރޮސް-ޑިވައިސް ޓޫލް މަސައްކަތް ކުރާނީ ދެކޮޅަށް ވެސް ބޭނުންކުރެވޭ ގޮތަށެވެ. އެއީ ފޯނުން ޓެބްލެޓަށް އަދި ޓެބްލެޓުން ފޯނަށް ވެސް މަސައްކަތްތައް ބަދަލުކޮށްލެވޭނެ ގޮތަށެވެ.
މި ފީޗާ މަސައްކަތް ކުރާ ގޮތް ގޫގުލްއިން ވަނީ ގޫގުލް ޑޮކްސް އަދި ޖީމެއިލް އެޕް ބޭނުންކޮށްގެން ދައްކާލާފައެވެ. އެގޮތުން، ފޯނުން އެޑިޓްކުރަމުންދިޔަ ޑޮކިއުމެންޓެއް، އެއް ގޫގުލް އެކައުންޓަކުން ގުޅާލެވިފައިވާ ޓެބްލެޓެއްގެ ޓާސްކްބާއަށް އޮޓޮމެޓިކުން ނޮޓިފިކޭޝަނެއްގެ ގޮތުގައި އަރައެވެ. އަދި، އޭގައި ފިތާލުމާ އެކު ފޯނުން ހުއްޓާލި ހިސާބުން ޓެބްލެޓުން އެ މަސައްކަތް ކުރިއަށް ގެންދެވޭތަން ވީޑިއޯއިން ދައްކައެވެ.
މީގެ އިތުރުން، ޖީމެއިލް އެޕް ބޭނުންކޮށްގެން ދައްކާލި އެހެން ވީޑިއޯއެއްގައި، ފޯނުން ހުޅުވާފައި ހުރި އީމެއިލް ތުރެޑެއް، ޓެބްލެޓްގެ ވެބް ބްރައުޒާ މެދުވެރިކޮށް ޖީމެއިލް ވެބުން ހަމަ އެ ހިސާބުން ހުޅުވައިދޭތަން ފެނެއެވެ.
ގޫގުލްއިން ބުނި ގޮތުގައި، ލިބޭ ޑިވައިސްގައި އެ އެޕްލިކޭޝަނެއް އިންސްޓޯލްކޮށްފައި ހުރިނަމަ، ސީދާ އެ އެޕުން ވެސް މަސައްކަތް ހުޅުވައިދޭނެއެވެ.
މި އައު އަޕްޑޭޓަކީ އެޕަލްގެ އިކޯސިސްޓަމްގައި ބޭނުންކުރާ 'ހޭންޑްއޮފް' ފީޗާއާ ވަރަށް އެއްގޮތް ސިފަތަކެއް އެކުލެވޭ ފީޗާއެކެވެ.
އެޕަލްގެ ހޭންޑްއޮފް ބޭނުންކުރުމަށްޓަކައި ހުރިހާ ޑިވައިސެއްގައި އެޕަލްގެ އެއް އެކައުންޓަކުން ލޮގިންވެ، ވައިފައިއާއި ބްލޫޓޫތު އޮންކުރަންޖެހޭއިރު، އެންޑްރޮއިޑްގެ މި ފީޗާގެ ސަބަބުން އެންޑްރޮއިޑް ގެންގުޅޭ ފަރާތްތަކަށް ވެސް ޑިވައިސްތަކުގެ މެދުގައި މަސައްކަތްތައް ބަދަލުކޮށްލަން ބޮޑު ފަސޭހައަކަށް ވާނެއެވެ.