ދުނިޔޭގެ ގިނަ ބަޔަކަށް ހަށިގަނޑަށް ލިބެންވާ ފުރިހަމަ ނިދި މަދުވުމުގެ މައްސަލަ ކުރިމަތިވެފައިވާ ދުވަސްވަރެއްގައި، ގިނަ ބަޔަކު ދަނީ އަރާމު ނިންޖެއް ހޯދުމަށްޓަކައި ތަފާތު ގޮތްތައް ހޯދަމުންނެވެ.
'ޒީރޯ ގްރެވިޓީ' ނުވަތަ ބާރު ދެރަ މާހައުލެއްގައި އޮންނަ ފަދަ ގޮތަކަށް ނިދުމަކީ މީގެ ހައްލަކަށް ވެދާނެ ކަމަށް ގަބޫލުކުރެވޭހެއްޔެވެ؟
ކޮންމެ މީހަކީވެސް ނިދާއިރު އަމިއްލައަށް އެންމެ ފަސޭހަވާނެ ވަކި ގޮތަކަށް އޮންނަ މީހެކެވެ. ބައެއް މީހުން ބޮނޑިވެގެން، އަނެއް ބަޔަކު އަރިއަކަށް، ނުވަތަ ބައެއް މީހުން ބަނޑުވަތަށް ބާލީހުގައި ބައްދާލައިގެން ނިދާއިރު، މަދު ބަޔަކު އުއްޑުން އޮވެގެންވެސް ނިދައެވެ. ނަމަވެސް، އަޅުގަނޑުމެނަށް އެންމެ ފަސޭހަވާ ގޮތަކީ އެއީ ހަށިގަނޑަށް އެންމެ ރަނގަޅު ގޮތް ކަމަށް ނުވެދާނެއެވެ.
ނިދީގެ ފެންވަރު ރަނގަޅު ކުރުމަށް މީހުން ގަދައަޅާ މަސައްކަތްކުރާ މި ޒަމާނުގައި، ރޭގަނޑުގެ ހަތް ގަޑިއިރު ނުވަތަ އަށް ގަޑިއިރު ހަށިގަނޑު ބާއްވާ ގޮތާ ބެހޭގޮތުން ވާހަކަ ދެކެވެނީ ވަރަށް މަދުންނެވެ. 'ޒީރޯ ގްރެވިޓީ' ނިދުމުގެ މަފްހޫމް އައިސްފައި ވަނީ މި ހިސާބުންނެވެ.
"ޒީރޯ ގްރެވިޓީ" ނުވަތަ ބާރު ދެރަ މާހައުލެއްގައި ނިދުމަކީ، ހަށިގަނޑަށް ކުރާ ދަމާބާރު ހަމަހަމަކޮށްދީ، މަސްތަކާއި ކަށިތަކަށް ކުރާ ބާރު ކުޑަކޮށް، މައިބަދަ ސީދާކޮށްދޭ ގޮތެއް ކަމަށް މާހިރުން ވިދާޅުވޭ--ފޮޓޯ/އިންޑިއާޓުޑޭ
މި ގޮތަށް ނިދުމުގެ އަސްލު ގުޅިފައި ވަނީ ނާސާއާއެވެ. އެއީ ފަޒާގެ ތެރޭގައި ހުންނަ ކުޑަ ބާރު ނުވަތަ 'މައިކްރޯ ގްރެވިޓީ'ގެ ސަބަބުން ހަށިގަނޑަށް ކުރާ ބާރު ކުޑަކުރުމަށް އެސްޓްރޮނޯޓުންނަށް ހާއްސަކޮށް ފަރުމާކުރި ގޮތެކެވެ.
"ޒީރޯ ގްރެވިޓީ" ނުވަތަ ބާރު ދެރަ މާހައުލެއްގައި އޮންނަ ފަދަ ގޮތަކަށް އޮތުމަކީ، ފަޒާގެ ތެރޭގައި އެސްޓްރޮނޯޓުން އަމަލުކުރާ ގޮތާ އެއްގޮތް ގޮތެކެވެ.
މިއީ ހަށިގަނޑަށް ކުރާ ދަމާބާރު ހަމަހަމަކޮށްދީ، މަސްތަކާއި ކަށިތަކަށް ކުރާ ބާރު ކުޑަކޮށް، މައިބަދަ ސީދާކޮށްދޭ ގޮތެކެވެ. ޕަލްމޮނޮލޮޖިސްޓް ޑރ. ލާންސެލޮޓް މާކް ޕިންޓޯ ވިދާޅުވާ ގޮތުގައި، މިގޮތަށް އޮންނައިރު ބޮލާއި ކަކޫ ހުންނަންވާނީ ހިތުގެ ލެވެލްއަށްވުރެ ގާތްގަނޑަކަށް ދެތިން އިންޗި މަތީގައެވެ. އަދި އުކުޅުވަޅުގެ އޭންގަލް ހުންނަންވާނީ ގާތްގަނޑަކަށް 120 ޑިގްރީގައެވެ.
މިގޮތަށް ނިދުމުގެ ސަބަބުން ލިބޭ ފައިދާތަކަށް ބަލާއިރު، ބުރަކަށީގެ ތިރީގައި ރިއްސާ މީހުންނަށް މީގެ ސަބަބުން ބޮޑު ލުޔެއް ލިބެއެވެ. އަދި ހަށިގަނޑުގެ މަތީބައި އުފުލާލައިގެން އޮތުމުން މޭ އެންދުމާއި، ގުރުގުރު އެޅުމާއި، އަދި ނިދީގައި ނޭވާލުމަށް އުނދަގޫވާ "ސްލީޕް އެޕްނިއާ" ފަދަ މައްސަލަތަކަށް ހައްލެއް ލިބެއެވެ.
ނިދުމަކީ އެކަމަށް މާ ބޮޑު އިލްމީ ތިއަރީއެއް ބޭނުންވާ ކަމެއް ނޫން ކަމުގެ މާހިރުން ވިދާޅުވޭ--ފޮޓޯ/އިންޑިއާޓުޑޭ
މީގެ އިތުރުން ފައި ކުޑަކޮށް ހިއްލާލައިގެން އޮތުމުން ލޭ ދައުރުވުން ރަނގަޅުވެ، ފައި ދުޅަވުން ކުޑަކޮށްދެއެވެ. މިއީ މާބަނޑު މީހުންނަށާއި، ސިއަޓިކާ ނުވަތަ ނާރުގެ މައްސަލަ ހުންނަ މީހުންނަށް ވެސް އެހީތެރިވެދޭނެ ގޮތެކެވެ.
ނަމަވެސް، މުޅި ރޭ އެއްކޮށް ހަށިގަނޑު މިގޮތަށް އޮތުމަކީ ބައެއް މީހުންނަށް، ހާއްސަކޮށް އަރިއަކަށް ނިދާ މީހުންނަށް އުނދަގޫ ކަމަކަށް ވެދާނެއެވެ.
ޑރ. މިހިރު ގަންގަޚެދްކަރް ފާހަގަކުރައްވާ ގޮތުގައި، މިގޮތަށް ނިދުމަށްޓަކައި އެޖަސްޓް ކުރެވޭ އެނދުތައް ބޭނުންކުރުން ފަސޭހަ ނަމަވެސް އެއީ އަގުބޮޑު އެއްޗެއްސެވެ. އެހެންކަމުން ބާލީސް ބޭނުންކޮށްގެން ވެސް މިކަން ކުރެވިދާނެއެވެ.
އެގޮތުން ބުރަކަށި ދަށަށް ހަރު ބާލީހެއް ލައިގެން 30 އާއި 45 ޑިގްރީގެ އޭންގަލަކަށް މަތީބައި އުފުލާލައި، ކަކޫ ދަށަށް ބާލީސް ލައިގެން އޮތް ނަމަވެސް، ނިދީގައި ބާލީސްތައް ކަހައިގެން ދިއުމުން މި ހާލަތު ދެމެހެއްޓުން ދަތިވެއެވެ.
އެންމެ ރަނގަޅު ނިދުމުގެ ގޮތަކީ ކޮބައިތޯ ސުވާލު ކުރުމުން މާހިރުން ބުނަނީ، ކޮންމެ މީހަކަށް ވެސް އެންމެ ރަނގަޅުވާނީ ވަކި ގޮތެކެވެ. ނިދުމަކީ އެކަމަށް މާ ބޮޑު އިލްމީ ތިއަރީއެއް ބޭނުންވާ ކަމެއް ނޫން ކަމަށާއި ހަށިގަނޑަށް މުހިއްމީ އަރާމު ލިބުން ކަމަށް މާހިރުން ވަނީ ބުނެފައެވެ.