ކުޑަކުދިންތަކަކަށް ޖިންސީ ގޯނާކުރިކަމުގެ ބޮޑެތި ތުހުމަތުތަކެއް ކުރެވޭ، ޓޫރިޒަމް ދާއިރާގައި ހަރަކާތްތެރިވި، ޙުސައިން ސަނީ އުމަރު މާދަމާ މެންދުރު ފަހު ކްރިމިނަލް ކޯޓަށް ހާޒިރު ކުރަން ތާވަލުކޮށްފިއެވެ.
ކުޑަކުދިންތަކަކަށް ޖިންސީ ގޯނާކުރިކަމުގެ ބޮޑެތި ތުހުމަތުތަކެއް ކުރެވޭ ސަނީ އުމަރު މާދަމާ ކޯޓަށް ހާޒިރުކުރަނީ، އޭނާގެ މައްޗަށް ދައުލަތުން އުފުލާފައިވާ ހަތަރު ދައުވާއެއްގެ ޝަރިއަތަށެވެ. ކްރިމިނަލް ކޯޓުގެ ތާވަލުގައިވާ ގޮތުން، ސިއްރުން ކުރިއަށް ގެންދާ މި ޝަރިއަތް އޮންނާނީ މާދަމާ ދޭއް ޖަހާއިރެވެ.
ދިވެހިރާއްޖޭގެ ގާނޫނުއަސާސީގެ 42 ވަނަ މާއްދާގައިވާ ގޮތުން، ޝަރީއަތްތައް ހިންގަންވާނީ އާންމުކޮށް ހުޅުވާލައިގެންނެވެ. ނަމަވެސް، ވަކި ހާއްސަ ހާލަތްތަކެއްގައި ޝަރީއަތް ސިއްރުކުރުމުގެ ބާރު ފަނޑިޔާރަށް ލިބިގެންވެއެވެ.
ޝަރީއަތް ސިއްރުކުރެވޭނެ ހާލަތްތަކުގެ ތެރޭގައި ކުޑަކުދިން ހިމެނޭ މައްސަލަތައް ހިމެނެއެވެ. ކުޑަކުދިންގެ މަސްލަހަތު ހިމާޔަތްކުރުމަށްޓަކައި ގިނަ ފަހަރަށް މިފަދަ ޝަރީއަތްތައް ކުރިއަށްގެންދަނީ ސިއްރުކޮށްގެންނެވެ. ޝަރީއަތް ސިއްރުކުރި ކަމުގައިވިޔަސް، މައްސަލައިގެ ހުކުމް އިއްވަންވާނީ އާންމުކޮށް ހުޅުވާލެވިފައިވާ މަޖިލީހެއްގައެވެ. ނަމަވެސް، ކުޑަކުދިންނާ ގުޅޭ މައްސަލަތަކާއި އާއިލީ މައްސަލަތަކުގައި ހުކުމް އިއްވާއިރުވެސް ބައެއް މައުލޫމާތު ސިއްރުކުރުމުގެ އިހުތިޔާރު ކޯޓަށް އޮވެއެވެ.
ސަނީގެ މައްޗަށް އުފުލާފައިވާ ދައުވާތަކުގެ ތެރޭގައި، ކުޑަކުއްޖެއްގެ ހަށިގަނޑުގައި ޖިންސީ ނިޔަތެއް އޮވެގެން ޤަޞްދުގައި އަތްލުމުގެ ތިން ދައުވާ ހިމެނެއެވެ. މި ދައުވާތައް އުފުލާފައިވަނީ ތަފާތު ތިން މައްސަލައެއްގައެވެ. އޭގެ ތެރޭގައި ކުޑަކުއްޖަކަށް އުމުރުން ހަތް އަހަރުން ފެށިގެން މިދިޔަ އަހަރުގެ އޮގަސްޓާ ހަމައަށް އެކި ދުވަސްމަތިން ޖިންސީ ގޯނާކުރި މައްސަލައަކާއި، އިތުރު ދެ ކުއްޖެއްގެ ގަޔަށް އަތްލި މައްސަލަ ހިމެނެއެވެ. މި ކޮންމެ ކުށަކަށް 10 އަހަރާއި 14 އަހަރާ ދެމެދުގެ ޖަލު އަދަބެއް އަންނާނެއެވެ.
ހަމައެއާއެކު، ޢަދުލު އިންސާފު ޤާއިމުކުރުމަށް ހުރަސްއެޅުމުގެ ދައުވާއެއްވެސް އޭނާއަށް ކޮށްފައިވެއެވެ. މި ދައުވާ ކުރީ ސަނީ އުމަރުގެ ފޯނުގައި މައްސަލައާ ގުޅޭ ހެކި ހުރިކަމަށް ތުހުމަތުކުރެވި، ފޯނު ހަވާލުކުރަން ކޯޓުން އަމުރުކުރުމުން، ފޯނު ގެއްލިފައިވާ ކަމަށް ބުނެ ފުލުހުންނާ ފޯނު ހަވާލުކޮށްފައި ނުވާތީއެވެ. މި ކުށުގެ އަސާސީ އަދަބަކީ އެއް އަހަރާއި ހަތް މަހާއި ހަ ދުވަހުގެ ޖަލު ހުކުމެކެވެ.
މީގެ އިތުރުން ރަސްމީ އިދާރާއަކަށް ދޮގު މަޢުލޫމާތު ދިނުމުގެ ދައުވާ ވެސް އޭނާއަށް ކޮށްފައިވެއެވެ. އެއީ އޭނާ ގެންގުޅުނު ސިމް ކާޑުގެ މައުލޫމާތު އޮޅުވާލައި ފުލުހުންނަށް ދޮގު މައުލޫމާތު ދީފައިވާތީއެވެ. އެ ކުށަށް ހަތަރު މަހާއި 24 ދުވަހުގެ ޖަލު އަދަބެއް ކަނޑައެޅޭނެއެވެ.
މި މައްސަލައިގެ ތަހުގީގު ކުރިއަށް ދިޔައިރު، މިދިޔަ ޖަނަވަރީއިން ފެށިގެން ސަނީ ހުރީ ޝަރީޢަތް ނިމެންދެން ބަންދުގައެވެ.