ސޯމާލިޔާގެ ފާހަގަކޮށްލެވޭ މެޗު އޮފިޝަލް އުމަރު އަބްދުލްގާދިރު އަރްތާން އެމެރިކާއަށް އެތެރެވުން އެގައުމުގެ އިމިގްރޭޝަން އިދާރާތަކުން މަނާކުރުމާ ގުޅިގެން، ކުރިއަށް އޮތް ފީފާ ވޯލްޑް ކަޕް 2026 ގައި ރެފްރީކަން ކުރުމުގެ ފުރުސަތު އޭނާއަށް ގެއްލިއްޖެއެވެ.
މިއީ ސޯމާލިޔާގެ ތާރީޚުގައިވެސް ދުނިޔޭގެ އެންމެ ބޮޑު ފުޓްބޯޅަ މުބާރާތުގައި އިންސާފުކުރުމަށް ރެފްރީއަކަށް ލިބުނު ފުރަތަމަ ތާރީޚީ ފުރުސަތެވެ.
ނަމަވެސް މިއާމީ އިންޓަނޭޝަނަލް އެއާޕޯޓަށް އޭނާ ދިއުމުން، އެމެރިކާގެ ބޯޑަރު ކޮންޓްރޯލް އޮފިޝަލުން ވަނީ އޭނާ ހުއްޓުވައި، އެގައުމަށް އެތެރެވިޔަނުދީ އަނބުރާ ފޮނުވާލާފައެވެ.
އެފްރިކާގެ ފުޓްބޯޅަ ފެޑެރޭޝަނުން ހޮވި 2025 ވަނަ އަހަރުގެ އެންމެ މޮޅު ފިރިހެން ރެފްރީގެ މަގާމު ހޯދާފައިވާ އަރްތާން، ފްލޮރިޑާއަށް ދިއުމުން އެއާޕޯޓުގައި ހިފަހައްޓައި ޑީޕޯޓްކޮށްލުމާ ގުޅިގެން އޭނާ މިހާރު ހުރީ ތުރުކީގައެވެ.
އޭނާ އަނބުރާ ފޮނުވާލި ސީދާ ސަބަބެއް އެމެރިކާގެ އިމިގްރޭޝަނުން ރަސްމީކޮށް ހާމަކޮށްފައި ނުވިނަމަވެސް، އެމެރިކާގެ މިހާރުގެ އިދާރީ ސިޔާސަތުތަކުގެ ދަށުން ސޯމާލިޔާގެ ރައްޔިތުންނަށް އެގައުމަށް އެތެރެވުމުގައި ހަރުކަށި ހުރަސްތަކެއް ހުރެއެވެ.
ސޯމާލިޔާގެ ފުޓްބޯޅަ ފެޑެރޭޝަނުން މި މައްސަލަ އިސްތިއުނާފު ކޮށްފައިވާއިރު، އަރްތާން ދަތުރުކުރީ ސައްހަ ލިޔެކިޔުންތަކާއި ޚާއްސަ ޑިޕްލޮމެޓިކް ޕާސްޕޯޓެއްގައެވެ.
މި ހާދިސާއާ ގުޅިގެން ދުނިޔޭގެ ފުޓްބޯޅައިގެ މައި އިދާރާ، ފީފާއިން ވަނީ އަރްތާނަށް މިފަހަރުގެ ވޯލްޑް ކަޕްގައި ބައިވެރިނުވެވޭނެކަން ކަށަވަރުކޮށްދީފައެވެ.
ފީފާއިން ނެރުނު ބަޔާނެއްގައި ބުނެފައިވަނީ، އެމެރިކާއަށް އެތެރެވުން މަނާކުރުމާ ގުޅިގެން ރެފްރީ އުމަރު އަބްދުލްގާދިރު އަރްތާނަށް ވޯލްޑް ކަޕް 2026 ގެ ތަމްރީނުތަކާއި މެޗުތަކުގައި އޮފިޝަލެއްގެ ގޮތުގައި ބައިވެރިނުވެވޭނެ ކަމަށެވެ. އަދި ވިސާ ދިނުމާއި ބޯޑަރު ބެލެހެއްޓުމުގެ ކަންކަމަކީ ބާއްވާ ގައުމުގެ ސަރުކާރުގެ އިޚްތިޔާރުގައި އޮންނަ ކަމެއް ކަމަށާއި، އޭގެ ތެރެއަށް ފީފާއަށް ވަދެވެން ނޯންނާނެ ކަމަށްވެސް އެ އިދާރާއިން ބުނެފައިވެއެވެ.
މި ނިންމުމުގެ ސަބަބުން ބައިނަލްއަގުވާމީ ބޮޑެތި މުބާރާތްތައް ބާއްވާއިރު އެމެރިކާއިން ގެންގުޅޭ ހަރުކަށި އިމިގްރޭޝަން އުސޫލުތަކާ މެދު ސިޔާސީ ގޮތުން ބޮޑެތި ބަހުސްތަކެއް ވަނީ އުފެދިފައެވެ.
މުބާރާތުގައި ބައިވެރިވާ އެތުލީޓުންނާއި އޮފިޝަލުންނަށް ފަސޭހައިން ދަތުރުފަތުރު ކުރެވޭނެ ކަމަށް އެމެރިކާ ސަރުކާރުން ކުރިން ބުނެފައިވީ ނަމަވެސް، އަމަލުތަކުން އެ މަންޒަރެއް ނުފެނެއެވެ.
ވައިޓް ހައުސްގެ ވޯލްޑް ކަޕް ޓާސްކް ފޯހުގެ ވެރިޔާ އެންޑްރޫ ޖިއުލިއާނީ ބީބީސީއަށް ދެއްވި ބަސްދީގަތުމެއްގައި ވިދާޅުވީ، ސިއްރު ބައެއް ސަބަބުތަކާ ހުރެ ތަފްސީލަށް ދެވެން ނެތް ނަމަވެސް، ކަސްޓަމްސް އެންޑް ބޯޑަރު ޕްރޮޓެކްޝަނުން ނިންމި ނިންމުމަކީ ރަނގަޅު ނިންމުމެއް ކަމަށާއި އޭނާ އެ ނިންމުމަށް ފުރިހަމައަށް ތާއީދުކުރައްވާ ކަމަށެވެ.