ދެކުނު އިންޑިއާގެ ފިލްމީ މަސައްކަތްތަކުގައި ގެންގުޅޭ ހަރުދަނާ އުސޫލުތަކުގެ ސަބަބުން އެ އިންޑަސްޓްރީއަށް ނިސްބަތްވާތީ ފަޚުރުވެރިވާ ކަމަށް ސައުތު ބަތަލާ ކާޖަލް އަގަރްވާލް ބުނެފިއެވެ.
ފިލްމީ މަސައްކަތްތަކުގައި ގެންގުޅޭ ހަރުދަނާ އުސޫލުތަކާއި ވަގުތަށް ސަމާލުކަންދޭ މިންވަރަށް ތައުރީފުކުރަމުން، މަޝްހޫރު ބަތަލާ ކާޖަލް އަގަރްވާލް ބުނީ، އެ ސަރަހައްދުގެ ފިލްމު ސެޓުތަކުގައި މަސައްކަތް ފަށަނީ ތާވަލާ އެއްގޮތަށް ކަމަށެވެ.
ވޭތުވެދިޔަ 20 އަހަރު ދެކުނު އިންޑިއާގެ ފިލްމީ ދާއިރާއާއި ބޮލީވުޑްގައި މަސައްކަތްކޮށްފައިވާ ކާޖަލް ވަނީ މި ދެ ސިނާއަތުގެ ތަފާތުތަކާ ބެހޭގޮތުން ތެދުވެރިކަމާއެކު ވާހަކަދައްކާފައެވެ.
ފިލްމު "ސިންގަމް" ލީޑް ބަތަލާގެ ގޮތުގައި ފެނުނު ކާޖަލް ފާހަގަކުރިގޮތުގައި، ދެކުނުގެ ފިލްމީ މަސައްކަތްތަކުގައި ޕްރޮފެޝަނަލިޒަމް އޮންނަ މިންވަރުގެ ސަބަބުން މަސައްކަތަށް އޮންނަ ޝައުގުވެރިކަން އިތުރުވެއެވެ.
މިއަދު ރިލީޒްކުރާ ކާޖަލްގެ ފިލްމު "ދަ އިންޑިއާ ސްޓޯރީ"ގެ މަންޒަރެއްގައި ބަތަލާ އެކްޓަރު ޝްރެޔަސް ތަލްޕަޅޭއާ އެކު--ފޮޓޯ/އިންޑިއާޓުޑޭ
ބޮލީވުޑްގެ ތަޖުރިބާ ހިއްސާކުރަމުން ކާޖަލް ބުނީ، ސަލްމާން ޚާނާ އެކު މަސައްކަތްކުރި ފިލްމެއްފައި ވަރަށް ގިނަ ވަގުތު އިންތިޒާރުގައި ހުންނަން ޖެހުނު ކަމަށެވެ. ނަމަވެސް އެ ވަގުތު ބޭކާރު ކޮށްލުމުގެ ބަދަލުގައި، ސެޓުގައި ހުންނަ ޖިމްގައި ކަސްރަތު ކުރުމުގައި އޭނާ ވަގުތު ހޭދަކުރި ކަމަށް ވަނީ ބުނެފައެވެ.
"ހިންދީ ފިލްމުތަކުގައި ކަންކަން އަބަދަކު ގަޑިއަކަށް ނުހިނގާ. އެކަމަކު ދެކުނުގައި އަހަރެމެން މަސައްކަތް ކުރަނީ ގަޑިއަށް ބަލައިގެން. ހެނދުނު 6 ޖަހާއިރު މަސައްކަތަށް ނުކުންނަން ބުނެފިނަމަ، ބަރާބަރު 6 ޖަހާއިރު މަސައްކަތް ފަށާނެ. އަހަރެން މިހާރު ހުންނަނީ އެ އުސޫލަށް އާދަވެފައި. އަދި އެގޮތް ވަރަށް ކަމުދޭ. މެންދުރު 1 ޖެހުމާއެކު އެންމެންނަށް ކެއުމުގެ ބްރޭކް ލިބޭނެ. އެކަމަކު ހިންދީ ފިލްމުތަކުގައި މި އުސޫލުތަކެއް ނޯވޭ،" ޝުބަންކަރު މިޝްރާއަށް ދިން އިންޓަވިއުއެއްގައި ކާޖަލް ބުނެފައިވެއެވެ.
ހިންދީ ފިލްމުތައް އިހުތިޔާރު ކުރުމުގައި ބަލައިގެން އުޅެނީ ކީއްވެގެންތޯ ސުވާލު ކުރުމުން ކާޖަލް ބުނީ، ދެކުނު އިންޑިއާގެ ފިލްމުތަކުން ލިބޭ ފަދަ ފެންވަރު ރަނގަޅު މަސައްކަތްތައް އޭރު ބޮލީވުޑުން ނުލިބޭ ކަމަށެވެ.
ކާޖަލް އިތުރަށް ބުނި ގޮތުގައި ފިލްމު ކުޅުމުގައި ބަހަކީ ދުވަހަކުވެސް އޭނާއަށް އޮތް ހުރަހެއް ނޫނެވެ. ފިލްމު އުފެއްދުމުގެ މަރުހަލާ އޭނާ ވަރަށް އުފަލާ އެކު ބަލައިގަންނަ ކަމަށާއި، އެކްޓިންއަށް ޝައުގުވެރިކަން އުފެދުނީ ގާތްގަނޑަކަށް ހަތް ފިލްމު ކުޅުމަށްފަހު ކަމަށް އޭނާ ބުންޏެވެ. އަދި މަސައްކަތަށް ލޯބިޖެހުމުން، ކޮންމެ ފިލްމެއްގައިވެސް އެންމެ ފުރިހަމައަށް މަސައްކަތް ކުރުމަށް އޭނާ އަބަދުވެސް އަޒުމް ކަނޑައަޅާ ކަމަށް ވަނީ ބުނެފައެވެ.
ކާޖަލް ދެން އެންމެ އަވަހަށް ބެލުންތެރިންނަށް ފެންނާނީ މިއަދު ސިނަމާތަކަށް ގެންނަ "ދަ އިންޑިއާ ސްޓޯރީ"އިންނެވެ. މީގެ އިތުރުން، ނިތޭޝް ތިވާރީ އުފައްދާ "ރާމާޔަން"ގެ ފުރަތަމަ އަދި ދެވަނަ ބައިން ވެސް ކާޖަލް ފެންނާނެއެވެ.