މި އަހަރުގެ ފީފާ ވޯލްޑްކަޕަކީ ތާރީޚުގައި ވެސް އެންމެ ގިނަ ބަޔަކު ޓީވީން ބެލި އެއް މުބާރާތެވެ. އެމެރިކާގައި އެކަނި ވެސް 62.8 މިލިއަން މީހުން ފައިނަލް މެޗު ބަލާފައިވާއިރު، މިއީ 2022 ވަނަ އަހަރުގެ ފައިނަލް ބެލި 1.5 ބިލިއަން މީހުންގެ ރެކޯޑު މުގުރާލާނެ ކަމަށް ބެލެވޭ މުބާރާތެކެވެ. ނަމަވެސް، މި ބޮޑު މުބާރާތް ގޭގައި ތިބެގެން ޓީވީން ބަލަމުން ދިޔަ އެތައް މިލިއަން ބެލުންތެރިންގެ ތެރެއިން ބައެއް ފޮޓޯގްރާފަރުން ވަނީ މުޅިން ތަފާތު އާޓިސްޓިކް ހަރަކާތެއް ފަށާފައެވެ. އެއީ މެޗު ހިނގަމުންދާ ވަގުތު ޓީވީ ސްކްރީނުން ފޮޓޯ ނެގުމުގެ ޓްރެންޑެކެވެ. ދުނިޔޭގެ އެކި ކަންކޮޅުތަކުގައި ފެތުރިގެން ދިޔަ މި ޓްރެންޑުގައި ބައިވެރިވި އާޓިސްޓުންގެ ތެރޭގައި ދިވެހި ޒުވާން ފޮޓޯގްރާފަރެއް ކަމަށްވާ އުމުރުން 22 އަހަރުގެ ނަޒީރާ ގައްޒާ ހިމެނެއެވެ.
ހައި އެޗީވާސް ސްކޮލާޝިޕްގެ ދަށުން އިނގިރޭސިވިލާތުގައި އާކިޓެކްޗާ ކިޔަވަމުން އަންނަ ނަޒީރާއަކީ ފޮޓޯގްރަފީގެ ދާއިރާއަށް މުޅިން އާ މީހެއް ނޫނެވެ. އޭނާ ބުނި ގޮތުގައި، ކުޑައިރުއްސުރެ ފޯނުން ފޮޓޯ ނަގައި އިންސްޓަގްރާމަށް ލުމަށް ޝައުގުވެރިކަން ހުރި ނަމަވެސް، ޕްރޮފެޝަނަލް ކެމެރާއެއް ގަތީ މިދިޔަ އަހަރުގެ ޑިސެންބަރު މަހުގައެވެ. އިނގިރޭސިވިލާތުގައި އުޅެމުން އެކި ގައުމުތަކަށް ދަތުރުކުރާއިރު އެ މަންޒަރުތައް ރައްކާކުރުމުގެ ބޭނުމުގައި ފެށި ޓްރެވަލް ފޮޓޯގްރަފީގެ މަސައްކަތުގެ ތެރެއިން އޭނާ ވަނީ ސިނަމެޓޯގްރަފީއާއި ފޮޓޯ އެޑިޓްކުރަން އަމިއްލައަށް ދަސްކޮށްފައެވެ. ވޯލްޑްކަޕް ދުވަސްވަރު ޗުއްޓީއަށް ރާއްޖެ އައިސް ހުރި ނަޒީރާ، މި ޓްރެންޑުގައި ބައިވެރިވީ ހަމައެކަނި އޭނާގެ އަމިއްލަ ހޮބީއެއްގެ ގޮތުގައެވެ.
އެކި ފޮޓޯގްރާފަރުން ޓީވީ ސްކްރީނުން ނެގި ވޯލްޑްކަޕް ފޮޓޯތައް---
ދަނޑަށް ނުދެވޭ ފޮޓޯގްރާފަރުން ގޭގައި ތިބެގެން ޓީވީ ސްކްރީނުން މެޗުގެ މަންޒަރުތައް ކެމެރާކުރުމަކީ ވަރަށް ތަފާތު އާޓިސްޓިކް ސްޓައިލެއް ކަމަށް ނަޒީރާ ފާހަގަކުރިއެވެ. މި ޓްރެންޑުގައި ބައިވެރިވި އާޓިސްޓުން ވަނީ އާދައިގެ ގޮތަކަށް ޓީވީ ސްކްރީން ފޮޓޯ ނެގުމުގެ ބަދަލުގައި، ފެން ކޮތަޅު ފަދަ ތަކެތި ބޭނުންކޮށްގެން ސްކްރީނަށް އެޅޭ އަލި ތަފާތުކޮށް، ޕިކްސެލްތައް ފާހަގަވާނެހެން މަންޒަރުތައް ކެޕްޗާކޮށްފައެވެ. ބޮޑެތި ފޮޓޯގްރާފަރުން މިގޮތަށް ނަގާ ފޮޓޯތައް ސޯޝަލް މީޑިއާގައި އާންމުކުރަން ފެށުމުން، މިއީ މުޅި ދުނިޔޭގައި ވެސް މަގުބޫލު ޓްރެންޑަކަށް ވެގެން ދިޔައެވެ.
ނަޒީރާ ބުނި ގޮތުގައި، އޭނާ ވެސް މެޗުތައް ބަލަމުން ސޮނީ ކެމެރާއަކުން ޓީވީ ސްކްރީނުގެ ފޮޓޯތައް ނަގައި، އޭނާގެ އަމިއްލަ ސްޓައިލަށް އެޑިޓްކުރުމަށްފަހު އިންސްޓަގްރާމްގައި ޕޯސްޓުކުރަމުން ދިޔައެވެ. މެޗު ނިމޭ ގަޑިއަށް ދުނިޔޭގެ އެކި ކަންކޮޅުތަކުގައި ތިބި ފޮޓޯގްރާފަރުން އެއްފަހަރާ މި ފޮޓޯތައް ޕޯސްޓުކުރަމުން ދިޔަކަން އޭނާ ފާހަގަކުރިއެވެ.
"އާންމުކޮށް މިކަހަލަ ޓްރެންޑުތަކުގައި ބައިވެރި ނުވަން. އެކަމަކު މި ހަރަކާތުގެ އާޓިސްޓިކް ސްޓައިލް މަސައްކަތާ ގުޅޭތީ ބައިވެރިވީ," ނަޒީރާ "ސަން" އަށް ކިޔައިދިނެވެ.
ނިއުޔޯކް ޓައިމްސްގައި ނަޒީރާގެ ފޮޓޯ ބޭނުންކޮށް, ކްރެޑިޓް ދީފައި
މި ޓްރެންޑުގެ ތެރެއިން ނަޒީރާ އިންސްޓަގްރާމްގައި ހިއްސާކުރި ފޮޓޯތަކަށް އާދަޔާޚިލާފު ބޮޑު ތަރުހީބެއް ލިބުނެވެ. އޭނާގެ އެއް ޕޯސްޓަށް އެއް މިލިއަނަށް ވުރެ ގިނަ ވިއުސް ލިބި، އެ ފޮޓޯތައް ވައިރަލްވެގެން ދިޔައެވެ. މި ބޮޑު ސަމާލުކަމުގެ ނަތީޖާއަކަށް ވީ، ދުނިޔޭގެ އެންމެ ނުފޫޒުގަދަ އެއް ނޫސް ކަމަށްވާ އެމެރިކާގެ ނިއުޔޯކް ޓައިމްސްގެ ނަޒަރު އޭނާގެ މަސައްކަތަށް ހުއްޓުމެވެ. އެ ނޫހުން އިންސްޓަގްރާމް މެދުވެރިކޮށް ނަޒީރާއާ ކޮންޓެކްޓްކޮށް, އެމީހުން ޝާއިއުކުރަން ތައްޔާރުވަމުންދިޔަ ޚާއްސަ އާޓިކަލްއެއްގައި އޭނާގެ ފޮޓޯތައް ހިމެނުމަށް ހުއްދަ ހޯދިއެވެ. މިއީ ފޮޓޯގްރަފީގެ ދާއިރާގައި ކުރިއަރަމުން އަންނަ ޒުވާނަކަށް ލިބުނު ވަރަށް ބޮޑު ކާމިޔާބީއެކެވެ.
މި މަހުގެ 19 ވަނަ ދުވަހު ނިއުޔޯކް ޓައިމްސްއިން ޝާއިއުކުރި "އަ ބިލިއަން އައިސް. ވަން ޝެއާޑް އެކްސްޕީރިއަންސް" (ބިލިއަނެއްހާ ލޯ. އެންމެން ހިއްސާކުރާ އެއް ތަޖުރިބާއެއް) މި އާޓިކަލް ލިޔެފައިވަނީ ޑަބްލިންއަށް ނިސްބަތްވާ ލިޔުންތެރިޔާ މާކް އޯކޮނެލްއެވެ. މި ލިޔުމުގައި އޭނާ ފާހަގަކޮށްފައިވަނީ، ވޯލްޑްކަޕަކީ ދަނޑަށް ގޮސް ބަލާ މުބާރާތަކަށްވުރެ ބޮޑަށް، މުޅި ދުނިޔެ އެއްފަހަރާ ޓީވީ ސްކްރީންތަކުން ބަލައި ތަޖުރިބާކުރާ ހަރަކާތެއް ކަމަށެވެ. އަދި އަމިއްލަ ސްމާޓްފޯންތަކުގެ ސްކްރީންތަކަށް މީހުންގެ ސަމާލުކަން ހުއްޓިފައިވާ މި ޒަމާނުގައި، ވޯލްޑްކަޕް ވެފައިވަނީ މުޅި ދުނިޔެ އެއް ކަމަކަށް ސަމާލުކަންދޭ މަދު ވަގުތުކޮޅުތަކުގެ ތެރެއިން ވަގުތެއް ކަމަށް އޭނާ ލިޔެފައިވެއެވެ.
އޯކޮނެލް ވަނީ 1960 ގެ އަހަރުތަކުގައި ލީ ފްރީޑްލޭންޑާ ފަދަ ފޮޓޯގްރާފަރުން ޓީވީ ސްކްރީންތައް ފޮޓޯނެގި ގޮތާއި މިހާރުގެ ޓްރެންޑާ ގުޅުވާލައި، މިއީ ހަމައެކަނި ކުޅިވަރުގެ މަންޒަރެއް ނޫންކަމާއި، މިއީ އިންސާނުން ޓެކްނޮލޮޖީއާ ގުޅިފައިވާ މިންވަރު ދައްކުވައިދޭ ކަމެއްގެ ގޮތުގައި ސިފަކޮށްފައެވެ. މި ލިޔުމުގައި ޓީވީ ސްކްރީނުން ފޮޓޯ ނެގުމުގެ އާޓިސްޓިކް ހަރަކާތަށް އަލިއަޅުވާލައި، ދުނިޔޭގެ އެކި ކަންކޮޅުތަކުން ހޮވާލެވުނު 15 ފޮޓޯގްރާފަރެއްގެ މަސައްކަތް ހިމަނާފައިވާއިރު، އޭގެ ތެރޭގައި ނަޒީރާގެ ނަން ރަސްމީކޮށް ކްރެޑިޓްކޮށްފައިވެއެވެ.
ނިއުޔޯކް ޓައިމްސް ފަދަ ބޮޑު ނޫހަކުން ޖާގަ ލިބުމަކީ ނަޒީރާ ދުވަހަކުވެސް އުންމީދުކުރި ކަމެއް ނޫނެވެ. އޭނާ ބުނި ގޮތުގައި، އެ އާޓިކަލްގެ ސަބަބުން އިންސްޓަގްރާމް ފޮލޯވަރުންގެ އަދަދަށް ކުއްލި ބޮޑު ބަދަލެއް ނައި ނަމަވެސް، ވައިރަލްވި ޕޯސްޓަށް ލިބެމުންދާ ކޮމެންޓުތަކާއި ލައިކްތައް އަދިވެސް ހުއްޓުމެއް ނެތި އަންނަމުންދެއެވެ.
މިހާރު ރާއްޖޭގައި ހުރެގެން ވެޑިން ފޮޓޯގްރަފީގެ މަސައްކަތްތައް ވެސް ތަޖުރިބާކުރަމުން އަންނަ ނަޒީރާގެ އަމާޒަކީ، މި ލިބުނު ބޮޑު ސަމާލުކަމުގެ ތެރެއިން އޭނާގެ އެހެން އުފެއްދުންތައް ވެސް އާންމުންނާ ހަމައަށް ގެނެސްދިނުމެވެ. ކެމެރާއެއް ގަތްތާ އަހަރެއް ނުވަނީސް ބައިނަލްއަގުވާމީ ފެންވަރުގައި ބަލައިގަނެވުނު މި ޒުވާނާ ދަނީ، އާކިޓެކްޗާ ކިޔެވުމާއެކު ފޮޓޯގްރަފީގެ ދާއިރާއިން ވެސް އޭނާގެ ހުނަރު އިތުރަށް ތަރައްގީކުރަމުންނެވެ.