އޯޕަންއޭއައިގެ އެތެރޭގެ ޓެސްޓިން މާހައުލުން ބޭރުވެ، އިންސާނުންގެ ބެލުމެއް ނެތި އަމިއްލައަށް ނިންމުންތައް ނިންމުމުގެ ގާބިލުކަން ލިބިފައިވާ އޭއައި އޭޖެންޓަކުން އޭއައި މޮޑެލްތަކާއި ޓޫލްސްތައް ރައްކާކުރާ މަޝްހޫރު ޕްލެޓްފޯމެއް ކަމަށްވާ ހަގިން ފޭސްއަށް ސައިބާ އެޓޭކެއް ދީފައިވާ ކަމަށް ރޮއިޓާސްއިން ރިޕޯޓުކޮށްފިއެވެ.
ޖުލައި 24 ގައި އާންމުކުރި މި ރިޕޯޓުގައިވާ ގޮތުން، މި ހާދިސާ ހުއްޓުވައި އެފްބީއައިއަށް އެންގުމާ ހަމައަށް ވެސް، މި އެޓޭކަކީ އެމީހުންގެ އަމިއްލަ އޭޖެންޓަކުން ދިން އެޓޭކެއްކަން އޯޕަންއޭއައިއަށް އެނގިފައެއް ނުވެއެވެ.
މި ހާދިސާގެ ތަފްސީލު ހާމަކުރައްވަމުން ހަގިން ފޭސްގެ ކޯ-ފައުންޑާ ތޯމަސް އުލްފް ވިދާޅުވީ، އޯޕަންއޭއައިގެ ސިސްޓަމުން މި އޭޖެންޓް ބޭރުވާން މަސައްކަތްކޮށްފައިވަނީ ޖުލައި 9 ވަނަ ދުވަހު ކަމަށެވެ. އަދި އޭގެ ދެ ދުވަސް ފަހުން، ޖުލައި 11 އިން 13 އަށް އެ އޭޖެންޓް ވަނީ ހަގިން ފޭސްގެ ސިސްޓަމްތަކަށް ވަދެ ހެކްކޮށްފައެވެ. ނަމަވެސް މިކަމުގައި ބައިވެރިވީ އޯޕަންއޭއައިގެ އޭޖެންޓެއްކަން އެނގުނީ ދެ ކުންފުނިން ޖުލައި 20 ގައި ކުރި މަޝްވަރާތަކަށް ފަހު، ޖުލައި 21 ގައެވެ.
ހަގިން ފޭސްއިން މިހާރު މި ހެކްގެ ފުރިހަމަ ޓައިމްލައިނެއް އާންމުކުރުމަށް ތައްޔާރުވަމުން ދާއިރު، އޯޕަންއޭއައިއިން ބުނެފައި ވަނީ މިއީ ކުރިން ދިމާވެފައި ނުވާ ފަދަ ހާދިސާއެއް ކަމަށާއި، މިއީ އޭއައިގެ ސަލާމަތާއި ރައްކާތެރިކަމަށް ވަރަށް މުހިންމު ފިލާވަޅެއް ކަމަށެވެ. އަދި ބޭރުގެ މާހިރުންނާއެކު މިކަން ދިރާސާކުރުމަށްފަހު ޓެކްނިކަލް ރިޕޯޓެއް ނެރޭނެކަމަށް އެ ކުންފުނިން ބުންޏެވެ. ނަމަވެސް، ރޮއިޓާސްގެ ރިޕޯޓުގައި ބައެއް ނުބައި މައުލޫމާތު ހުރިކަމަށް އޯޕަންއޭއައިގެ ތަރުޖަމާނަކު ބުނެފައިވީ ނަމަވެސް، އެއީ ކޮން މައުލޫމާތެއްކަން ހާމަކޮށްފައެއް ނުވެއެވެ.
މި ހާދިސާ ހިނގި ދުވަސްވަރު އޯޕަންއޭއައިއިން ޓެސްޓުކުރަމުން ދިޔައީ އެ ކުންފުނީގެ އެންމެ ކުރިއަރާފައިވާ މޮޑެލް ކަމަށްވާ ޖީޕީޓީ-5.6 ސޯލް އާއި، އާންމުނުކުރާ ނަމަވެސް ވަރުގަދަ މޮޑެލްތަކެއް ބޭނުންކޮށްގެން އުފައްދާފައިވާ އޭޖެންޓުންގެ ސައިބާ ސެކިއުރިޓީ ގާބިލުކަމެވެ. ރިޕޯޓުތައް ބުނާ ގޮތުގައި މީގެ ކުރިން ވެސް ބައެއް ނުރައްކާތެރި ކަންކަން ފެނިފައި ވެއެވެ. އޭގެ ތެރޭގައި، އޭޖެންޓުން ފަހުން އަންނަ ވާޝަންތަކަށް ނޯޓުތައް ލިޔެ، އޯޕަންއޭއައިގެ ސެކިއުރިޓީ ބަންދުތަކުން މިނިވަންވާނެ ގޮތުގެ އިރުޝާދުތައް ދީފައި ހުރުމާއި، މޮނިޓާ ކުރާ ސިސްޓަމްތައް ނިއްވާލާފައި ހުރުން ހިމެނެއެވެ. ނަމަވެސް ކުރީގެ މި ކަންކަމާ ޖުލައި 9 ގައި ފިލި އޭޖެންޓާ ގުޅުމެއް އޮތްކަން ކަށަވަރުވެފައެއް ނުވެއެވެ.
ހަގިން ފޭސްއިން ޖުލައި 16 ގައި އެމީހުންގެ ސިސްޓަމް ހެކްކުރީ އަމިއްލައަށް މަސައްކަތްކުރާ އޭއައި ސިސްޓަމަކުން ކަމަށް ބްލޮގް ޕޯސްޓެއްގައި ހާމަކުރުމުން، އޯޕަންއޭއައިގެ މުވައްޒަފުން އެތެރޭގެ ލޮގްތައް ބަލައި އެކަން ދެނެގަތީ ޖުލައި 18 އާއި 19 އާއި ދެމެދުގައެވެ. މަސްދަރުތަކުން ބުނާ ގޮތުގައި އޯޕަންއޭއައިއިން އެއްފަހަރާ ގިނަ ޓެސްޓުތަކެއް ވަރަށް ހަލުވިކޮށް ކުރުމުގެ ސަބަބުން އުފެދޭ ޑޭޓާ ބޮޑުވެ، މުވައްޒަފުންނަށް ކަންކަން މޮނިޓާކޮށް ބެލެހެއްޓުމަށް ބޮޑެތި ގޮންޖެހުންތަކާ ކުރިމަތިވެއެވެ.
ސައިބާ ސެކިއުރިޓީ މާހިރުން ސިފަކުރައްވާ ގޮތުގައި މިއީ އޭއައި އޭޖެންޓުންނަށް އަމިއްލައަށް މިނިވަންކަމާއެކު މަސައްކަތްކުރުމުގެ ހުއްދަ ދިނުމުން ނުކުމެދާނެ ބޮޑެތި ނުރައްކާތައް ހާމަވެގެންދިޔަ ހާދިސާއެކެވެ. ވޯލްޑް އެތިކަލް ޑޭޓާ ފައުންޑޭޝަންގެ މާލީ ސްމިތު ވިދާޅުވި ގޮތުގައި، އޯޕަންއޭއައިއިން އޭޖެންޓް ބެލެހެއްޓުމެއް ނެތި ދޫކޮށްލައިގެން އުޅުނު ކަމުގައި ވިޔަސް، ނުވަތަ އެކަން އެނގިތިބެ ކޮންޓްރޯލް ނުކުރެވުނު ކަމުގައި ވިޔަސް، މިއީ އެއްވަރެއްގެ ބޮޑު ނުރައްކަލެއް އަދި އިންތިހާއަށް ކަންބޮޑުވާންޖެހޭ ކަމެކެވެ.
މި ހާދިސާއާ ގުޅޭގޮތުން އެފްބީއައިއިން އެއްވެސް މައުލޫމާތެއް ދޭން ދެކޮޅު ހަދާފައިވެއެވެ.