ތާރީޚީ ޝަޚްސިއްޔަތުތަކާ ގުޅުންހުރި ލަވަތަކާއި، ނިޝާންތަކާއި، އަދި އިޝާރާތްތައް އާންމުންގެ އިހުސާސްތަކާ ކުޅޭ ފަދަ ގޮތްގޮތަށް ބޭނުންކުރުން ހުއްޓުވުމަށް، ރާޖަސްތާނުގެ ކުރީގެ އިދިކޮޅު ލީޑަރު އަދި ބީޖޭޕީގެ އިސް މެންބަރު ރާޖެންދުރަ ރާތޯރު، އިންޑިއާގެ ފިލްމު ސެންސަރު ބޯޑަށް ގޮވާލައިފިއެވެ
ރާތޯރު އިހުތިޖާޖު ކޮށްފައިވަނީ އިންޑިއާގެ ބޮކްސް އޮފީހުގައި ބޮޑު ކާމިޔާބީއެއް ހޯދަމުން އަންނަ ފިލްމު "މިރްޒާޕޫރު: ދަ މޫވީ"ގައި ދައްކުވައިދޭ މާރާމާރީ މަންޒަރެއްގައި، މަހާރާނާ ޕްރަތާޕަށް ނިސްބަތްވާ ލަވައެއް ބޭނުންކޮށްފައިވާ މައްސަލައަކާ ގުޅިގެންނެވެ. މިގޮތުން، ރާޖަސްތާނީ ފޯކް ލަވަކިޔުންތެރިޔާ އަޝޯކް މަންޑާ ބިޝްނޯއީ ކިޔާފައިވާ 'ޝޫރުވީރު' މި ލަވަ ފިލްމުން އުނިކުރުމަށް އެދި، ސީބީއެފްސީގެ ޗެއާމަން ޝަޝީ ޝޭކަރް ވެމްޕަތީއަށް އޭނާ ވަނީ ސިޓީއެއް ފޮނުވާފައެވެ.
ރާތޯރު ބުނެފައިވާ ގޮތުގައި، ގޭންގްސްޓަރުންނާއި ކުށްވެރިންގެ އަމަލުތައް ދައްކުވައިދޭ މަންޒަރެއްގައި މިފަދަ ލަވައެއް ހިމެނުމަކީ ބަލައިގަނެވޭނެ ކަމެއް ނޫން ކަމަށާއި، އެއީ ގިނަ ބައެއްގެ އިހުސާސްތަކަށް ގެއްލުންވާނެ ކަމެއް ކަމަށެވެ. އަދި މަހާރާނާ ޕްރަތާޕްގެ މަތިވެރި އުސޫލުތަކާއި ކުށްވެރިންގެ އުޅުމާ އެއްވެސް ގުޅުމެއް ނެތްއިރު، އެފަދަ ގޮތަކަށް އެކަން ދެއްކުމަކީ އެ ތާރީޚީ ތަރިކައަށް ކުރެވޭ ވަރަށް ބޮޑު އިހުތިރާމްކުޑަ އަމަލެއް ކަމަށް އޭނާ ވަނީ ސިފަކޮށްފައެވެ.
ފިލްމު "މިރްޒާޕޫރު: ދަ މޫވީ"ގެ ކާސްޓުގައި ހިމެނޭ ތަރިން އެ ފިލްމުގެ ސެޓުގައި ހަރަކާތްތެރިވަނީ--ފޮޓޯ/ބޮލީވުޑްހަންގާމާއަދި މީގެ އިތުރުން، މި މައްސަލައިގައި ސޯޝަލް މީޑިއާގައި އުފެދިފައިވާ ކަންބޮޑުވުންތަކަށް ރިއާޔަތްކޮށް، ފިލްމުން އެ ލަވައިގެ ބައިތައް އުނިކުރުމަށާއި، ކުރިއަށް އޮތް ތަނުގައިވެސް ތާރީޚީ ކަންކަމާމެދު މިފަދައިން އަމަލުކުރުން ހުއްޓުވުމަށް ސީބީއެފްސީއަށް ވަނީ ބާރުއަޅާފައެވެ.
މި ލަވައަކީ މުޣަލް ލަޝްކަރާ ދެކޮޅަށް ހަލްދީގާޓީގައި ކުރެވުނު ހަނގުރާމައިގައި މަހާރާނާ ޕްރަތާޕް ދެއްކެވި ހިތްވަރާއި، އޭނާގެ ވަފާތެރި 'ޗޭތަކް'ގެ ނަމުން ނަންދީފައިވާ އަހެއްގެ ހަނދާންތައް ދިރުވައިދޭ ލަވައެކެވެ.
ލަވަކިޔުންތެރިޔާ ބިޝްނޯއީ އިންސްޓަގްރާމް މެދުވެރިކޮށް ހާމަކުރި ގޮތުގައި، މި ފިލްމުގައި އެ ލަވަ ބޭނުންކޮށްފައިވަނީ އޭނާގެ އެއްވެސް ހުއްދައެއް ނެތިއެވެ. އަދި ނުބައި ބައި (ވިލަންސް) ޕްރޮމޯޓްކުރުމަށް މި ލަވަ ނަހަމަ ގޮތުގައި ބޭނުންކޮށްފައިވާތީ އޭނާވެސް ވަނީ ނުރުހުން ފާޅުކޮށްފައެވެ. މިކަމާ ގުޅިގެން ފިލްމު "މިރްޒާޕޫރު: ދަ މޫވީ"ގެ ޓީމުން މިހާތަނަށް ވަކި އެއްޗެއް ނުބުނެއެވެ.