ހުޅުމާލޭގައި މީހުން ހިނގާ ބިނގާވެ އުޅޭ ދުވާރުތަކުގައި އުޅަނދުފަހަރު ޕާކު ކުރާނަމަ އެ އުޅަނދުތަކުގެ ވެރިފަރާތްތަކާ މެދު ފިޔަވަޅު އަޅާނެކަމަށް ފުލުހުން ބުނެފިއެވެ.
ފުލުހުން ސޯޝަލްމީޑިއާގައި ކުރި ޕޯސްޓެއްގައި ބުނީ ހުޅުމާލޭގެ މަގުތަކުގައި ހިނގާބިނގާވެ އުޅޭ މީހުންނަށް ޚާއްސަކޮށްފައިވާ ދުވާރުތަކުގައާއި، އާންމު ދަތުރުފަތުރަށް ދަތިވާގޮތަށް އުޅަނދު ޕާކުކުރުން އިތުރުވަމުންދާކަން ދިވެހި ފުލުހުންގެ ޚިދުމަތަށް ފާހަގަކުރެވިފައިވާ ކަމަށެވެ.
ފުލުހުން ބުނި ގޮތުގައި މިގޮތަށް އުޅަނދު ޕާކުކުރުމަކީ ނުރައްކާތެރި އެކްސިޑެންޓްތައް ހިނގަން މެދުވެރިވާ ކަމެކެވެ. އެެހެންކަމުން އާންމު ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމުގެ ގޮތުންނާއި މަގުމަތީގެ އަމާންކަން ދެމެހެއްޓުމަށްޓަކައި، އެފަދަ ސަރަހައްދުތަކުގައި އުޅަނދު ޕާކުނުކުރުމަށް އެންމެހައި ފަރާތްތަކަށް އިލްތިމާސްކުރާކަމަށާއި މިގޮތަށް ޕާކުކޮށްފައި ހުންނަ އުޅަނދުތަކާމެދު ފިޔަވަޅު އަޅަމުންގެންދާނެ ކަމަށް ފުލުހުންގެ ޕޯސްޓްގައި ބުނެފައިވެއެވެ.
https://x.com/PoliceMv/status/2105990648574996964
ފަހަކަށް އައިސް މާލެ ސަރަހައްދުތަކުގައި ހިނގާ އެކްސިޑެންޓްތަކުގެ ތެރެއިން ގިނަ އެކްސިޑެންޓްތައް ހިނގާފައިވަނީ ހުޅުމާލެ ސަރަހައްދުތަކުގައެވެ.
މާލޭގައި ދުއްވާ އުޅަނދުތައް އިތުރުވެ، ޕާކުކުރާނެ އިންތިޒާމެއް ހަމަޖެހިފައި ނެތުމަކީ ދިމާވެފައިވާ އެންމެ ބޮޑު މައްސަލައެވެ. އެ މައްސަލަ ހައްލުކުރުމަށް، މިފަހުން ފުލުހުން ވަނީ މާލެއާއި ހުޅުމާލޭގެ މަގުމަތީގެ ރައްކާތެރިކަން ކަށަވަރުކޮށް، ޓްރެފިކް މައްސަލަތައް ހައްލުކުރުމުގެ ގޮތުން ގަވާއިދާ ޚިލާފަށް ޕާކުކުރާ އުޅަނދުތައް ޓޯކުރަމުންނެވެ.
ޚާއްސަކޮށް ޓޯކުރެވެނީ އާންމު ދަތުރުފަތުރަށް ދަތިވާގޮތަށް ގޯޅިތަކުގެ ކަންމައްޗާއި މަގުގެ ދެފަރާތުގައި ޕާކުކުރާ އުޅަނދުތަކާއި، މިސްކިތްތަކާއި ސްކޫލް އަދި ހޮސްޕިޓަލް ފަދަ ޒަރޫރީ ސަރަޙައްދުތަކުގެ ކުރިމަތީގައާއި، ހިނގާ މީހުންނަށް ދަތިވާގޮތަށް ޕޭވްމަންޓް މަތީގައި ޕާކުކުރާ އުޅަނދުތަކެވެ. މީގެއިތުރުން ރަޖިސްޓްރީނުކޮށް ހުންނަ އުޅަނދުތަކާއި މަގުމައްޗަށް ދޫކޮށްލާފައިވާ ބާ އުޅަނދުތައް ވެސް ފުލުހުން ޓޯކުރެއެވެ.