މާފަރު އިންޓަނޭޝަނަލް އެއާޕޯޓަށް ފުރަތަމަ ފަހަރަށް ވައިޑް ބޮޑީ އެއާކްރާފްޓު، ބޮއިންގް 777ގެ ފްލައިޓެއް މިއަދު ޖައްސައިފިއެވެ.
މި ފްލައިޓު އެ އެއާޕޯޓަށް ޖެއްސީ، ވައިޑް ބޮޑީ މަތިންދާބޯޓުތައް ޖެއްސޭނެވަރުގެ ގާބިލުކަން އެ އެއާޕޯޓުގައި ހުރިތޯ ބެލުމަށް ޓަކައި ކުރިއަށްގެންދާ ސެޓްފިކޭޝަން ޕްރޮސެސްގެ ތެރެއިންނެވެ. މި ޕްރޮސެސްގައި ކުރިއަށްގެންދާނެ ކަންކަމުގެ ތެރޭގައި:
• ބޯޓު ޖެއްސުމާއި ފުރުމުގައި ރަންވޭގެ ރައްކާތެރިކަން ޓެސްޓު ކުރުން
• ތެޔޮއެޅުމާއި، ފަސިންޖަރުންނަށް ޚިދުމަތް ދިނުމާއި، އަދި ކާގޯ އޮޕަރޭޝަންތަކަށް ގްރައުންޑް ހޭންޑްލިން އެސެސްމަންޓްތައް ހެދުން
• އޭވިއޭޝަން މިންގަނޑުތަކާ އެއްގޮތްވާ ގޮތުގެމަތިން ނެވިގޭޝަނާއި އެއާ ޓްރެފިކް ކޮންޓްރޯލް އިވެލުއޭޝަންތައް ހެދުން
މާފަރު އެއާޕޯޓަށް ފުރަތަމަ ވައިޑްބޮޑީ އެއާކްރާފްޓުގެ ޓެސްޓު ފްލައިޓު ޖެއްސުން -- ފޮޓޯ/ ރިފްއަތު އިބްރާހީމް
މާފަރު އިންޓަނޭޝަނަލް އެއާޕޯޓުން ތައްޔާރުވަމުންދަނީ ދުރު މަންޒިލުތަކަށް ކުރާ ބައިނަލްއަގުވާމީ ދަތުރުތައް ފެށުމަށެވެ. އެގޮތުން، އެ އެއާޕޯޓު 'އިންޓަނޭޝަނަލް ކުރުމަށް' ޓަކައި ވަނީ ބޮޑެތި އަޕްގްރޭޑުތަކެއް ގެނެސްފައެވެ.
އޭގެ ތެރޭގައި 2.2 ކިލޯމީޓަރުގެ ރަންވޭ 2.8 ކިލޯމީޓަރަށް ބޮޑުކުރުން ހިމެނެއެވެ. މިހާރު އެ ރަންވޭގައި ބޮއިންގް 777 އަދި އޭ330 ފަދަ ބޮޑެތި މަތިންދާބޯޓުތައް ޖެއްސޭނެއެވެ.
މީގެ އިތުރުން، އޭޕްރަންގެ ޖާގަ ވަނީ 13އިން 26އަށް އިތުރުކޮށްފައެވެ.
މާފަރު އެއާޕޯޓުގައި ދުރުރާސްތާ ދަތުރުތައް ފެށުމުން، މުހިންމު އޭވިއޭޝަން ހަބެއްގެ ގޮތުގައި އެ އެއާޕޯޓުގެ ދައުރު ފުޅާވާނެއެވެ.
މާފަރު އެއާޕޯޓު ހުޅުވީ 2019ގައި، ކުރީގެ ރައީސް އިބްރާހީމް މުހައްމަދު ސާލިހުގެ ވެރިކަމުގައެވެ. މި އަޕްގްރޭޑުތައް ގެނައުމަށް ޓަކައި ވަގުތީ ގޮތުން އެ އެއާޕޯޓުގެ އިންޓަނޭޝަނަލް އޮޕަރޭޝަންތައް ހުއްޓައިލީ މިދިޔަ އަހަރުގެ މެއި މަހުއެވެ.
އެ ސަރަހައްދަކީ ފެންވަރު ރަނގަޅު ގިނަ ރިސޯޓުތަކެއް ވެސް ހިންގާ ސަރަހައްދަކަށް ވެފައި، މި އެއާޕޯޓު ފުރަތަމަ ތަރައްގީކުރީ ފަތުރުވެރިކަން ފުޅާކުރުމުގެ ބޭނުމުގައެވެ. ނަމަވެސް، މިހާރު އެ ތަނަށް އިތުރުކުރެވުނު އިންފްރާސްޓްރަކްޗަރާއެކު، އެއާޕޯޓު ވާނީ ރާއްޖޭގައި މުހިންމު އޭވިއޭޝަން ހަބަކަށެވެ. އެ ގޮތުން ޔޫރަޕާއި، މެދު އިރުމަތީ ގައުމުތަކާއި އަދި އޭޝިއާއިން މާފަރަށް ސީދާ ދަތުރުތައް ކުރެވުމަށް މަގު ފަހިވާނެއެވެ.