ފަލަސްތީނުގެ މިނިވަން ދައުލަތެއް ހުއްޓުވުމުގެ މަގްސަދުގައި ހިފާފައިވާ ހުޅަނގު އައްސޭރީގެ މައްޗަށް އިސްރާއީލުގެ ކޮންޓްރޯލް ހަރުދަނާ ކުރުމަށް އިސްރާއީލުގެ ސަލާމަތީ ކެބިނެޓުން އާ ގަވާއިދުތަކެއް ފާސްކޮށްފިއެވެ.
އިސްރާއީލުގެ ނޫސްތަކެއް ކަމަށްވާ ވައިނެޓް އާއި ހާރެޓްޒް އިން ބުނާ ގޮތުގައި އާ ފިޔަވަޅުތަކުގެ ތެރޭގައި ހިފާފައިވާ ހުޅަނގު އައްސޭރީގައި ޔަހޫދީންނަށް ބިން ގަތުން ހުއްޓުވި ގަވާއިދުތައް އުނިކުރުން ހިމެނެއެވެ.
އަދި ބައެއް ދީނީ ތަންތަން ބެލެހެއްޓުމުގެ ޒިންމާ އުފުލުމަށް އިސްރާއީލުގެ ކަމާބެހޭ ފަރާތްތަކަށް ހުއްދަ ދިނުމާއި، ފަލަސްތީނު އޮތޯރިޓީ (ޕީއޭ) އިން ހިންގާ ސަރަހައްދުތަކުގައި އިސްރާއީލުން ސުޕަވައިޒްކުރުމާއި ކަންތައްތައް ތަންފީޒުކުރުން އިތުރުކުރުން ވެސް ހިމެނޭ ކަމަށް މީޑިއާ ރިޕޯޓްތައް ބުނެއެވެ.
އިސްރާއީލުގެ ހަރުކަށި ކަނާތު ފިޔައިގެ މާލީ ވަޒީރު ބެޒާލެލް ސްމޮޓްރިޗްގެ އޮފީހުން ނެރުނު ބަޔާނެއްގައި ބުނެފައިވާ ގޮތުގައި ފަލަސްތީނުގެ ދައުލަތެއް އުފެއްދުން ހުއްޓުވުމުގެ މަސައްކަތް އިސްރާއީލުން އަދިވެސް ކުރިއަށް ގެންދާނެއެވެ.
މި ގަވާއިދުގެ ސަބަބުން އިސްރާއީލުގެ ވަޒަންވެރިންނަށް ހިފާފައިވާ ހުޅަނގު އައްސޭރީން ބިން ގަތުމަށް ފަސޭހަވެ، އެ ސަރަހައްދުގައި ތިބި ފަލަސްތީނުގެ ރައްޔިތުންނާ މެދު ގާނޫނުތައް ތަންފީޒު ކުރުމަށް އިސްރާއީލުގެ އޮފިޝަލުންނަށް ވަރުގަދަ ބާރުތަކެއް ލިބިގެންދާނެ ކަމަށް އެ ގައުމުގެ މީޑިއާތަކުން ބުނެއެވެ.
ޣައްޒާ އާއި ހިފާފައިވާ އިރުމަތީ ގުދުސް އާއި އެކު ފަލަސްތީނުން މުސްތަގުބަލުގައި މިނިވަން ދައުލަތެއް ހޯދުމަށް މަސައްކަތްކުރާ ސަރަހައްދުތަކުގެ ތެރޭގައި ހުޅަނގު އައްސޭރި ހިމެނެއެވެ. ހުޅަނގު އައްސޭރީގެ ބޮޑު ބައެއް އޮތީ ސީދާ އިސްރާއީލުގެ އަސްކަރީ ކޮންޓްރޯލްގެ ދަށުގައެވެ. ބައެއް ސަރަހައްދުތަކުގައި ފަލަސްތީނުގެ އަމިއްލަ ވެރިކަމުގެ ބާރުވެސް އިންތިހާއަށް ވަނީ ހަނިވެފައެވެ.
ފަލަސްތީނުގެ ރިޔާސަތުން ނެރުނު ބަޔާނެއްގައި ވަނީ އެ ނިންމުމަކީ "ނުރައްކާތެރި" ނިންމުމެއް ކަމަށް ބުނެފައެވެ. އަދި އެއީ އާބާދީ ފުޅާކުރުމާއި ބިން އަތުލުން އިސްރާއީލުން ކުރާ ފާޅުކަން ބޮޑު މަސައްކަތެއް ކަމަށް ބުނެފައެވެ. ރައީސް މަހްމޫދު އައްބާސްގެ އޮފީހުން ވަނީ އެމެރިކާއާއި އދ.ގެ ސަލާމަތީ މަޖިލީހުން އެ މައްސަލައަށް ތަދައްޚުލްވުމަށް ގޮވާލާފައެވެ.
އުރުދުންގެ ޚާރިޖީ ވުޒާރާއިން ވެސް ވަނީ އެ ނިންމުމަކީ ގަވާއިދާ ހިލާފަށް އިސްރާއީލުގެ އާބާދީތައް ވަރުގަދަ ކުރުމަށް ނިންމާފައިވާ ނިންމުމެއް ކަމަށް ބުނެ އެކަން ކުށްވެރިކޮށްފައެވެ.
އާ ގަވާއިދުތައް އިއުލާނުކޮށްފައި ވަނީ އިސްރާއީލުގެ ރައީސް ބެންޖަމިން ނަތަންޔާހޫ އެމެރިކާގެ ރައީސް ޑޮނަލްޑް ޓްރަމްޕާ ބައްދަލުކުރުމަށް ތައްޔާރުވެފައިވަނިކޮށެވެ.
ހުޅަނގު އައްސޭރީގައި ރާވަފައިވާ ސެޓްލްމަންޓް މަޝްރޫއުގެ ދަށުން 3،400 ގެ އަޅަން ނިންމައި، ވަޒަންވެރިވާނެ ގޮތުގެ ޕްލޭނެއްވެސް މިދިޔަ އަހަރު އޮގަސްޓު މަހު އިސްރާއީލުގެ ކެބިނެޓުން ވަނީ ފާސްކޮށްފައެވެ.