މައި އިދިކޮޅު އެމްޑީޕީގެ ޗެއާޕާސަން ސަމާލުކަން އެންމެ ބޮޑަށް ދޭން ޖެހޭނީ ޕާޓީ ހިންގައި، ޕާޓީގެ މެންބަރުންގެ އެތެރޭގެ ގުޅުން ވަރުގަދަކުރުމަށް ކަމަށް، އެ މަގާމަށް ވާދަކުރައްވާ ގަލޮޅު ދެކުނު ދާއިރާގެ މެންބަރު މީކާއީލް އަޙްމަދު ނަސީމް ރޭ ވިދާޅުވެއްޖެއެވެ.
މާފަންނު ބޮނޑިބަތް ޕާކުގައި މީކާއީލްގެ "އިތުބާރު" ކެމްޕެއިންގެ ފަރާތުން ރޭ ބޭއްވި ޖަލްސާގައި ވާހަކަ ދައްކަވަމުން މީކާއީލް ވިދާޅުވީ، އެމްޑީޕީގެ ޗެއާޕާސަން ކަމަށް އިންތިޚާބުކޮށްދީފިނަމަ، އެ މަގާމަކީ ރާއްޖޭގެ ރައީސުލްޖުމްހޫރިއްޔާގެ މަގާމަށް ކޮށާ މަގަކަށް އޮންނަ އޮތުން ނިމުމަކަށް ގެންނާނަން ކަމަށެވެ.
"އެމްޑީޕީގެ ޗެއާޕާސަންގެ ފުލް ފޯކަސް ހުންނަންވާނީ މި ޕާޓީ ހިންގައިދޭން، މި ޕާޓީގެ، ރަށްރަށުގައި ތިބި އާންމު މެންބަރުންނާއި އަޅުގަނޑުމެންގެ މައި އޮފީހާއި، އެ ޕާޓީގެ، އަޅުގަނޑުމެންގެ ރަށްތަކުގައި އޮތް ގޮފިތަކާއި ދާއިރާތަކާއި މި ޕާޓީގެ މައި އޮފީހާ، އިންތިޚާބެއް އޮތަސް، އިންތިޚާބެއް ނެތަސް، އަޅުގަނޑުމެންގެ ގުޅުން ކެނޑިޔަނުދީ އެ ހިފަހައްޓައިދިނުން، އެއީ ޗެއާޕާސަންގެ އެންމެ އިސް ވާޖިބަކީ،" މީކާއީލް ވިދާޅުވިއެވެ.
މީގެ އިތުރުން، އޭނާ އެމްޑީޕީގެ ޗެއާޕާސަންކަމަށް އިންތިޚާބުކޮށްދީފިނަމަ، އެ ޕާޓީ ވެރިރަށް މާލެއަށް ބަރޯސާވެފައި އޮންނަ އޮތުން ހުއްޓުވައި، ރަށްރަށުގައި ހަރަކާތްތެރިކޮށްދެއްވާނެ ކަމަށް، މީކާއީލް ވިދާޅުވިއެވެ.
ހަމަ އެހެންމެ، ދެން އަންނަ ރިޔާސީ އިންތިޚާބުގެ ކުރިން، އެމްޑީޕީއަކީ އެންމެ ބޮޑު، އެންމެ ޒުވާން ޕާޓީއަކަށް ހައްދަވައިދެއްވާނެ ކަމަށް، މީކާއީލް ވައުދުވެވަޑައިގަތެވެ. އެކަން ކުރައްވާނެ ގޮތަކީ، އޭނާ ވިދާޅުވިގޮތުގައި، އެމްޑީޕީއަށް ލިބޭ ފައިސާއިން ވަކި މިންވަރެއް، އެ ޕާޓީގެ ޒުވާނުންގެ ގޮފި ކަމަށްވާ ޒުވާނުންގެ ހިތްވަރާއި، އަންހެނުންގެ ގޮފި ކަމަށްވާ އަންހެނުންގެ ރޫހަށް ޚާއްސަކޮށްދީގެންނެވެ.
"ތި ބޭފުޅުންނަށް ޗެއާޕާސަންއަށް އާދޭސް ނުދަންނަވައި، އެމްޑީޕީގެ މައި އޮފީހަށް އާދޭސް ނުދަންނަވައި، ތި ބޭފުޅުންގެ ހަރަކާތްތައް ހިންގުމުގެ މިނިވަންކަން މި ޕާޓީގެ ތެރެއިން އަޅުގަނޑު ކަށަވަރުކޮށްދޭނަން،" މީކާއީލް ވިދާޅުވިއެވެ.
އެމްޑީޕީއަށް ބޭނުންވަނީ ޒުވާން އައު ޖީލެއް ކަމަށް، މީކާއީލް ވިދާޅުވިއެވެ.
މީކާއީލް ވިދާޅުވީ، ޗެއާޕާސަންކަމަށް ވާދަކުރައްވަނީ އިޚުލާސްތެރިކަމާއެކު ކަމަށެވެ.
"ތެދުވެރިކަމާއެކު، ތި ބޭފުޅުންނަށް ޑީލްތަކުން ފުރިގެންވާ ހުތުރު ޕޮލިޓިކްސްއެއްނޫން ސިޔާސީ ދާއިރާއެއް މި އެމްޑީޕީ ތައާރަފުކޮށްދޭން، ޑީލްތަކުން ފުރިގެންވާ ހުތުރު ދާއިރާއެއް ނޫން ދާއިރާއެއް ގޮތަށް މި ދާއިރާ ހެދިގެން ނޫނީ ޒުވާނުން މި ދާއިރާއަކާ ބައިވެރިއެއް ނުވާނެ، އަޅުގަނޑުގެ މަގުސަދަކީ އެމްޑީޕީއަކީ އެ ދާއިރާއަކީ ޒުވާނުން ބައިވެރިވާހިތްވާނެ، އަދި ޒުވާނުންގެ ބައިވެރިވުން އޮންނާނެ ގޮތަށް މި ރާއްޖޭގެ މުސްތަގްބަލު ބައްޓަންކުރާނޭ މަދަދުވެރިއަކަށް މި އެމްޑީޕީ ހެދުން،" އޭނާ ވިދާޅުވިއެވެ.