ހަ މިލިއަން ފީފާގެ ތެޔޮ ހިފައިގެން ދަތުރުކުރަމުންދިޔަ ތިން ޓޭންކަރު ދެ މަހަށްވުރެ ގިނަ ދުވަހު ގަލްފުގައި މަޑުކުރުމަށްފަހު، ހުރްމުޒް ކަނޑުއޮޅިން ނުކުމެފައިވާ ކަމަށް އެލްއެސްއީޖީ އާއި ކެޕްލާއާ ޝިޕިން ޑޭޓާ އިން ދައްކައިފިއެވެ.
މި ބޯޓުތަކަކީ އީރާނުން ބޯޓުތަކަށް ދަތުރުކުރުމަށް އަންގާފައިވާ ޓްރާންސިޓް ރޫޓެއް މެދުވެރިކޮށް މި މަހު ގަލްފުން ނުކުންނަ މަދު ސުޕަޓޭންކަރުތަކުގެ ތެރޭގައި ހިމެނޭ ބޯޓުތަކެކެވެ.
ކެޕްލާއިން ދައްކާ ގޮތުގައި މާޗް މަހުގެ ހަތަރު ވަނަ ދުވަހު ކުވޭތުން ދެ މިލިއަން ފީފާގެ ތެޔޮ ހިފައިގެން ދަތުރުކުރި ދެކުނު ކޮރެއާގެ ދިދަ ޖަހާފައިވާ ވެރީ ލާޖް ކްރޫޑް ކެރިއާ (ވީއެލްސީސީ) ޔުނިވާސަލް ވިނާއާއި ޗައިނާގެ ދެ ޓޭންކަރެއް ބުދަ ދުވަހު ކަނޑުއޮޅި ހުރަސްކޮށްފައިވެއެވެ. ކެޕްލާގެ ޑޭޓާއިން ދައްކާ ގޮތުގައި ޓޭންކަރު ދަތުރުކުރަމުންދަނީ އެގައުމުގެ އެންމެ ބޮޑު ރިފައިނަރު އެސްކޭ އެނާޖީ ހުންނަ އުލްސާން އަށެވެ. އެ ބޯޓުން އަންނަ ޖޫން މަހު ނުވަ ވަނަ ދުވަހު މުދާ ބާލާނެ ކަމަށް ބެލެވޭ ކަމަށްވެސް ޑޭޓާއިން ދައްކައެވެ.
ޗައިނާގެ ދިދަ ޖަހާފައިވާ ވީއެލްސީސީ ޔުއާން ގޫއީ ޔަންގް އިން އީރާނާ ދެކޮޅަށް އެމެރިކާ އާއި އިސްރާއީލުން ހަނގުރާމަ ފެށުމުގެ އެއް ދުވަސް ކުރިން ފެބްރުއަރީ 27 ވަނަ ދުވަހު ދެ މިލިއަން ފީފާގެ ތެޔޮ އިރާގުގެ ބަސްރާ އިން ލޯޑްކުރިއެވެ.
އޭޝިއާގެ އެންމެ ބޮޑު ރިފައިނަރު ސިނޮޕެކްގެ ޓްރޭޑިން އަމް ޔުނިޕެކް އިން ޗާޓަރުކޮށްފައިވާ މި އުޅަނދު ބުދަ ދުވަހުގެ ވަގުތެއްގައި ކަނޑުއޮޅިން ނުކުމެފައިވާއިރު، ގުއަންޑޮންގް ޕްރޮވިންސްގެ ދެކުނުގެ މައޯމިން ސިޓީ ކައިރީގައި އޮންނަ ޝުއިޑޮންގް ބަނދަރަށް ޖޫން ހަތަރު ވަނަ ދުވަހު ކައިރިކުރާނެ ކަމަށް ޑޭޓާއިން ދައްކައެވެ.
ހޮންކޮންގުގެ ދިދަ ޖަހާފައިވާ ވީއެލްސީސީ އޯޝަން ލިލީ އިން ފެބްރުއަރީ މަހުގެ ފަހުކޮޅާއި މާޗް މަހުގެ ކުރީކޮޅު ގަތަރުގެ އަލްޝާހީން އާއި އިރާގުގެ ބަސްރާއިން ދެ މިލިއަން ފީފާގެ ތެޔޮ ބަރުކޮށްފައިވެއެވެ.
ޗައިނާގެ ބޮޑު ސިނޯކެމްގެ މި އުޅަނދު މުދާ ބޭލުމަށް ކުރުމަށް ޖޫން މަހުގެ ފަސް ވަނަ ދުވަހު ފުޖިއަން ޕްރޮވިންސްގެ އިރުމަތީ ކުއަންޒޯ ބަނދަރަށް ދާނެ ކަމަށް ބެލެވެއެވެ.
މިދިޔަ ހަފްތާގައި ވީއެލްސީސީ ޔުއާން ހޫއާ ހޫ ވަނީ އިރާގުގެ ދެ މިލިއަން ފީފާ ތެޔޮ ހިފައިގެން ކަނޑުއޮޅިން ނުކުމެ އިރުމަތީ ޗައިނާގެ ޒޯޝާން ބަނދަރަށް މިސްރާބު ޖަހާފައެވެ.
ފެބްރުއަރީ 28 ވަނަ ދުވަހު އީރާނާ ދެކޮޅަށް އެމެރިކާއާއި އިސްރާއީލުން ފެށި ހަނގުރާމައިގެ ސަބަބުން އާންމުކޮށް ދުނިޔޭގެ ތެލާއި ހަކަތަގެ ފަސްބައިކުޅަ އެއްބައި އުފުލާ ހުރްމުޒް ކަނޑުއޮޅީގެ ކޮންޓްރޯލު އީރާނުން ވަނީ ނަގާފައެވެ. އެހެންވެ އެ ކަނޑުއޮޅިން ބޯޓުތައް ދަތުރުކުރާ މިންވަރު ވަނީ ވަރަށް ބޮޑަށް މަދުވެފައެވެ.
ކަނޑުއޮޅިން އީރާނުގެ ބަނދަރުތަކަށް ދަތުރުކުރާ އުޅަނދުތަކަށް އެމެރިކާއިންވެސް ވަނީ ހުރަސް އަޅާފައެވެ. ކަނޑުއޮޅި ބަންދުކޮށްފައި އޮތުުމުން ތެލުގެ ސަޕްލައިއަށް ބުރޫއަރައި ތެލުގެ އަގު އަންނަނީ އިންތިހާއަށް އުފުލެމުންނެވެ.
ނަމަވެސް ތިން ޓޭންކަރު ކަނޑުއޮޅިން ނުކުމެފައިވާކަން ރިޕޯޓުކުރުމާއެކު، ތެލުގެ އަގު ވަނީ ހަ ޕަސަންޓް ދަށްވެފައެވެ.
އެމެރިކާއާއި އީރާނުން ބަދަލުކުރި ހަމަލާތައް އޭޕްރީލް އަށް ވަނަ ދުވަހުން ފެށިގެން މެދުކަނޑާލާފައި އޮތްއިރު، ދާއިމީ ސުލްހައިގެ އެއްބަސްވުމަށް އަދިވެސް އޮތީ ނާދެވިއެވެ.