މި އަހަރުގެ ފުރަތަމަ ފަސް މަސްދުވަހުގެ ތެރޭގައި ދައުލަތަށް ލިބުނު ހިލޭ އެހީގެ އަދަދު ވަރަށް ބޮޑަށް އިތުރުވެއްޖެއެވެ.
ފިނޭންސް މިނިސްޓްރީން އާންމުކޮށްފައިވާ މި އަހަރުގެ މެއި މަހުގެ ފިސްކަލް ޑިވެލޮޕްމަންޓްސް ރިޕޯޓުގައިވާ ގޮތުން، ޓެކްސް ނޫން އާމްދަނީ އާއި އެހީގެ ގިންތީގެ ކުރިއެރުމުގެ މައިގަނޑު ސަބަބަކީ މިއީއެވެ.
ތަފާސްހިސާބުތަކުން ދައްކާ ގޮތުގައި، މި އަހަރުގެ ޖެނުއަރީ މަހުން ފެށިގެން މެއި މަހުގެ ނިޔަލަށް ދައުލަތަށް ހިލޭ އެހީގެ ގޮތުގައި 394.1 މިލިއަން ރުފިޔާ ވަނީ ލިބިފައެވެ. މިއީ މިދިޔަ އަހަރުގެ މި މުއްދަތުގައި ލިބުނު 128.0 މިލިއަން ރުފިޔާއާ އަޅައި ބަލާއިރު 207.89 އިންސައްތައިގެ ކުރިއެރުމެކެވެ.
މި ކުރިއެރުން އެންމެ ބޮޑަށް ފާހަގަކުރެވިފައިވަނީ މެއި މަހުގައެވެ. އެގޮތުން، މިދިޔަ އަހަރުގެ މެއި މަހު ހިލޭ އެހީގެ ގޮތުގައި 28.2 މިލިއަން ރުފިޔާ ލިބުނުއިރު، މި އަހަރުގެ މެއި މަހު އެ އަދަދު ވަނީ 907.80 އިންސައްތަ އިތުރުވެ، 284.2 މިލިއަން ރުފިޔާއަށް އަރާފައެވެ. ފުރަތަމަ ފަސް މަސްދުވަހުގެ ތެރޭގައި ލިބުނު ހިލޭ އެހީގެ ޖުމްލަ އަދަދު ވަނީ، މިއަހަރަށް ފާސްކޮށްފައިވާ ބަޖެޓުގައި ހިލޭ އެހީގެ ގޮތުގައި ލިބޭނެ ކަމަށް ލަފާކުރި 373.6 މިލިއަން ރުފިޔާއަށްވުރެ އިތުރުވެފައެވެ.
މި މުއްދަތުގެ ތެރޭގައި ދައުލަތަށް ލިބުނު ޖުމްލަ އާމްދަނީ އާއި ހިލޭ އެހީ ވަނީ 10.80 އިންސައްތަ އިތުރުވެފައެވެ. މިދިޔަ އަހަރުގެ ފުރަތަމަ ފަސް މަހު 17,132.8 މިލިއަން ރުފިޔާ ލިބުނުއިރު، މި އަހަރުގެ އެ މުއްދަތުގައި 18,982.7 މިލިއަން ރުފިޔާ ވަނީ ލިބިފައެވެ. މިއީ މުޅި އަހަރަށް ލަފާކޮށްފައިވާ 40,374.5 މިލިއަން ރުފިޔާގެ އާމްދަނީއާ ދިމާއަށް ދާކަން އަންގައިދޭ ކަމެކެވެ. މެއި މަހުގެ ޖުމްލަ އާމްދަނީ އާއި ހިލޭ އެހީ ވަނީ 2,812.0 މިލިއަން ރުފިޔާއިން 2,835.1 މިލިއަން ރުފިޔާއަށް (0.82 އިންސައްތަ) އިތުރުވެފައެވެ. ދައުލަތުގެ މާލިއްޔަތަށް އެންމެ ބޮޑު އާމްދަނީއެއް ލިބިފައިވަނީ ޓެކްސްގެ ގޮތުގައެވެ.
ފުރަތަމަ ފަސް މަހު ޓެކްސް އާމްދަނީ ވަނީ 12.86 އިންސައްތަ އިތުރުވެ، 13,064.5 މިލިއަން ރުފިޔާއިން 14,744.4 މިލިއަން ރުފިޔާއަށް އަރާފައެވެ. މުޅި އަހަރަށް ޓެކްސް އާމްދަނީގެ ގޮތުގައި ލަފާކޮށްފައިވަނީ 31,297.1 މިލިއަން ރުފިޔާއެވެ. ނަމަވެސް، މެއި މަހުގެ ޓެކްސް އާމްދަނީ ވަނީ 10.55 އިންސައްތަ ދަށަށް ގޮސްފައެވެ. އެއީ 2025 ވަނަ އަހަރުގެ މެއި މަހު ލިބުނު 2,171.5 މިލިއަން ރުފިޔާއާ އަޅައި ބަލާއިރު، މި އަހަރުގެ މެއި މަހު ލިބުނު 1,942.3 މިލިއަން ރުފިޔާއެވެ.
ޓެކްސް ނޫން އާމްދަނީއަށް ބަލާއިރު، މި އަހަރުގެ ފުރަތަމަ ފަސް މަހު ލިބުނު އަދަދު ވަނީ 2.44 އިންސައްތަ ދަށަށް ގޮސްފައެވެ. މިދިޔަ އަހަރުގެ އެ މުއްދަތުގައި 3,939.6 މިލިއަން ރުފިޔާ ލިބުނުއިރު، މި އަހަރު ލިބިފައިވަނީ 3,843.4 މިލިއަން ރުފިޔާއެވެ. މިއަހަރަށް ޓެކްސް ނޫން އާމްދަނީގެ ގޮތުގައި ލަފާކޮށްފައިވަނީ 8,702.3 މިލިއަން ރުފިޔާއެވެ. މެއި މަހުގެ ޓެކްސް ނޫން އާމްދަނީ ވެސް ވަނީ 612.2 މިލިއަން ރުފިޔާއިން 608.5 މިލިއަން ރުފިޔާއަށް (0.60 އިންސައްތަ) ދަށަށް ގޮސްފައެވެ.
މީގެ އިތުރުން، ކެޕިޓަލް ރިސީޕްޓްސްގެ ގޮތުގައި ފުރަތަމަ ފަސް މަހު ލިބުނު އަދަދު ވަނީ 0.7 މިލިއަން ރުފިޔާއިން 0.9 މިލިއަން ރުފިޔާއަށް (28.57 އިންސައްތަ) އިތުރުވެފައެވެ. މުޅި އަހަރަށް ލަފާކޮށްފައިވަނީ 1.6 މިލިއަން ރުފިޔާއެވެ. މެއި މަހުގެ ކެޕިޓަލް ރިސީޕްޓްސް ވަނީ ދެ އަހަރު ވެސް 0.1 މިލިއަން ރުފިޔާގައި ހިފެހެއްޓިފައެވެ.
އާމްދަނީ އިތުރުވެފައިވާއިރު، ދައުލަތުގެ ބަޖެޓުން ކުރި ޚަރަދު ވެސް ވަނީ ފުރަތަމަ ފަސް މަސްދުވަހުގެ ތެރޭގައި ވަރަށް ބޮޑަށް އިތުރުވެފައެވެ.