ސިންގަޕޫރުގައި ލޯބީގެ ގުޅުމެއްގެ ތެރެއިން ދަރަންޏަށް ދިން 321،116 ސިންގަޕޫރު ޑޮލަރު (ގާތްގަނޑަކަށް 234،400 އެމެރިކާ ޑޮލަރު) އަނބުރާ ދެއްކުމަށް، އެ ފައިސާ ނެގި ފިރިހެން މީހާގެ މައްޗަށް ސިންގަޕޫރުގެ ހައިކޯޓުން ހުކުމްކޮށްފިއެވެ.
މި މައްސަލަ ކޯޓަށް ހުށަހެޅުނީ، އެ ފައިސާއަކީ ލޯބީގެ ގުޅުމެއްގެ ތެރެއިން ދިން ހަދިޔާއެއްތޯ ނުވަތަ އަނބުރާ ދައްކަންޖެހޭ ދަރަންޏެއްތޯ ކަނޑައެޅުމަށެވެ.
މި މައްސަލައިގައި ދައުވާކުރި ފަރާތަކީ ފައިނޭންސް މެނޭޖަރެއް ކަމަށްވާ ޓިއޯ ސިއޮކް ފެން އެވެ. ދައުވާ ލިބުނު ފަރާތަކީ ޓިއުޝަން ޓީޗަރެއް އަދި ކެފޭއެއްގައި މަސައްކަތްކުރާ މީހެއްކަމަށްވާ ޗީ ވެއި ޖުން އެވެ. މި ދެ މީހުން 2023 ވަނަ އަހަރުގެ ޖޫން މަހު އޮންލައިން ޑޭޓިން ޕްލެޓްފޯމެއް ކަމަށްވާ ކޮފީ މީޓްސް ބޭގަލް މެދުވެރިކޮށް ބައްދަލުވެ، އޭގެ ކުޑަ ދުވަސްކޮޅެއް ފަހުން ލޯބީގެ ގުޅުމެއް ފެށިއެވެ.
މި ގުޅުމުގެ ތެރޭގައި ޓިއޯ ވަނީ ޗީ އަށް އޮންލައިންކޮށާއި ނަގަދުކޮށް ވެސް ފައިސާ ދީފައެވެ. އަދި އޭނާގެ ކްރެޑިޓް ކާޑުތައް ވެސް ޗީ ބޭނުންކުރުމުގެ ހުއްދަ ދިނެވެ. ޓިއޯ ބުނާ ގޮތުގައި އެ ފައިސާގެ ތެރޭގައި އޭނާ ރައްކާކުރި ގާތްގަނޑަކަށް ހުރިހާ ފައިސާއަކާއި، ކްރެޑިޓް ކާޑުތަކުން ނެގި ކޭޝް އެޑްވާންސްތައް ހިމެނެއެވެ. ދެހާސް ތޭވީސްވަނަ އަހަރުގެ ޑިސެމްބަރު މަހާ ހަމައަށް، ޓިއޯ އަށް ވަނީ ބޭންކުތަކުން ކްރެޑިޓް ކާޑު ބިލްތައް ދެއްކުމަށް ސިޓީ ލިބެން ފަށާފައެވެ.
ޓިއޯ ދައުވާކުރި ގޮތުގައި، ޗީ އޭނާ އަށް މުއްސަނދި މީހެއްގެ ގޮތުގައި އަމިއްލަ މީހާ ދައްކައި، އޭނާގެ ބޭންކު އެކައުންޓްގައި ބައި މިލިއަނަށްވުރެ ގިނަ ސިންގަޕޫރު ޑޮލަރު އެބަހުރި ކަމަށާއި، އޭނާގެ ބައްޕައަށް ސިންގަޕޫރާއި މެލޭޝިއާގައި އެތައް ކުންފުނިތަކެއް ހުރި ކަމަށް ބުންޏެވެ. އަދި އޭނާގެ އެކައުންޓް ފްރީޒްވެފައިވާ ކަމަށާއި، އެކައުންޓްގެ މައްސަލަ ހައްލުވުމުން ފައިސާ އަނބުރާ ދައްކާނެ ކަމަށް ބުނެ މިސް ޓިއޯ އަތުން ފައިސާ ނެގިއެވެ.
ނަމަވެސް ޗީ ބުނީ، އެ ފައިސާއަކީ ޓިއޯ އޭނާއަށް ދިން ލޯބީގެ ހަދިޔާއެއް ކަމަށާއި، އޭނާ މިސް ޓިއޯގެ ކްރެޑިޓް ކާޑު ބޭނުންކުރީ އެންމެ ފަހަރަކު ކަމަށެވެ.
ސިންގަޕޫރުގެ ހައިކޯޓުގެ ފަނޑިޔާރު އެލެކްސް ވޮންގް ވަނީ ޓިއޯގެ ފައިސާއަކީ ދަރަންޏެއް ކަމަށް ނިންމަވާފައެވެ. ފަނޑިޔާރު ވިދާޅުވީ ޗީގެ ބަހަށް އިތުބާރު ނުކުރެވޭ ކަމަށާއި، އޭނާ އަބަދުވެސް އޮޅުވާލާފައިވާ ކަމަށެވެ. ޗީ އާއި ޓިއޯ އާ ދެމެދު ހިނގި ވައިބާ ޗެޓްތަކުން އެ ފައިސާއަކީ ދަރަންޏެއްކަން ސާފުކޮށް އެނގޭ ކަމަށް ފަނޑިޔާރު ފާހަގަކުރެއްވިއެވެ. ޓިއޯ އޭނާ ދިން ފައިސާގެ ރެކޯޑުތައް ދެއްކުމުން ވެސް އެއީ ހަދިޔާއެއް ނޫންކަން ދައްކައެވެ.
ފަނޑިޔާރު ވަނީ ޗީ، ޓިއޯ އަށް އޭނާގެ ހަގީގީ ދަރަޖައަށް ވުރެ މަތީ ދަރަޖައެއްގައި ދެއްކުމަށް މަސައްކަތްކޮށްފައިވާކަން ފާހަގަކުރައްވާފައެވެ. އޭނާ "އޭވިއޭޝަން" ދާއިރާގައި މަސައްކަތްކުރާ ކަމަށް ބުނި ނަމަވެސް، ހަގީގަތުގައި އޭނާ އަކީ ޓިއުޝަން ޓީޗަރެއް އަދި ކެފޭ މަސައްކަތްތެރިއެކެވެ.
އަދި ޗީ، އޭނާގެ މައްޗަށް ދައުވާކުރެވުނު ފަހުން، އެއްބަސްވުންތަކުގައި ސޮއިކުރީ މަޖުބޫރުކުރުމުގެ ދަށުން ކަމަށް ބުނެ ދިފާއުވާން މަސައްކަތްކުރި ނަމަވެސް، ކޯޓަށް އެކަން ސާބިތުކޮށްދެވިފައެއް ނުވެއެވެ.